DILI, 03 janeiru 2020 (TATOLI)-Sekretária Estadu Protesaun Sivíl (SEPS), sesta (3/01/2020), kontinua fó apoiu emerjénsia (hahán /food item) ba família uma-kain 119 ne’ebé afetadu husi inundasaun iha Aldeia Ramelau, Mane Mesak no Lesibutak, Suku Manleuana, Postu Administrativu Don Aleixo, Munisípiu Dili.
Notísia Relevante : Mota Sobu Uma 50-Resin iha Manleuana
Diretór Jerál SEPS, Superintendente Asistente Polisia Ismael da Costa Babo, esplika, apoiu ne’e atu hakmaan komunidade sira, tanba inundasaun, foin lalais ne’e, lori sofrimentu ba sira tanba estraga hotu sira nia uma, ai-horis no ai-han uma laran nian.
“Ho ai-han ne’e bele sustenta família vítima sira ho temporáriu,” hateten Ismael Babo, iha ámbitu entrega apoiu emerjénsia ne’e ba komunidade afetadu sira iha Sede Suku Manleuana.
Apoiu emerjénsia faze dahuluk nian hala’o tiha ona ba ba uma-kain 155 iha loron 30 dezembru 2019, nune’e ba faze daruak nian kontinua ba komunidade uma-kain 119.
Iha inundasaun ne’e sobu uma 10 ho kondisaun estragu total, uma seluk bee nalihun tama uma laran de’it.
Xefe Suku Manleuana, Jacob Tilman Soares, lori komunidade afetadu nia naran hato’o agradesimentu ba governu ne’ebé sempre tau atensaun ba nia povu no espera liuhusi apoiu sira ne’e bele hakmaan komunidade sira nia terus.
Jornalista : Nelson de Sousa
Editór : Francisco Simões
