Sekretáriu Estadu ba Protesaun Sivíl, Alexandrino Xavier de Araújo. Imajen/Egas Cristovão

DILI, 15 janeiru 2020 (TATOLI)-Liña Ministeriais,  kompostu husi Ministériu Administrasaun Estatál (MAE), Sekretáriu Estadu Protesaun Sivíl (SEPS), Ministériu Obras Públika (MOP), Ministériu Solidariedade Sosiál no Inkluzaun (MSSI), tersa (14/01/2020), halo ona enkontru koordenasaun atu haree hamutuk mekanizmu asaun atu responde ba situasaun dezastre naturaís ne’ebé lori sofrimentu ba populasaun iha territóriu nasionál.

Notísia Relevante :SEPS Fó Apoiu Emerjénsia ba Uma-Kain 119 iha Manleuana 

Sekretáriu Estadu Protesaun Sivíl, Alexandrino Xavier de Araújo, informa, ohin, iha Parlamentu Nasional (PN), katak, reuniaun koordenasaun ne’e atu fortifika komunikasaun ho autoridade lokál hodi halo asaun emerjénsia bainhira mosu dezastre ne’ebé afeta ba komunidade nia vida.

Oitavu governu, afirma Alexandrino Xavier,  kontinua fó protesaun no asisténsia ba nia sidadaun hotu bainhira afetadu husi dezastre naturaís. Nia apela ba sidadaun hotu iha territóriu laran, ho époka tempu udan daudaun ne’e atu hadook-an husi fatin risku ba dezastre hanesan mota ninin, foho lolon sira no ai-hun boot sira.

Notísia Relevante : PM Taur Orienta Ministériu Tolu Servisu Hamutuk Apoiu Vítima Dezastre Naturál

Sekretáriu Estadu Protesaun Sivíl, Alexandrino Xavier de Araújo  dehan, nia parte seidauk simu relatóriu  loloos kona-ba númeru uma-kain ne’ebé  afetadu husi dezastre iha  munisipiu sira relasiona ho anin no udan boot  ne’ebé akontese, husi loron 30 dezembru 2019 to’o mai iha loron 7 fulan janeiru 2020.

Munisípiu sira ne’ebé sofre dezastre durante époka udan-anin boot, foin lalais, ne’e mak  hanesan   Munisípiu Manatuto, Manufahi, Baucau no seluk tan. Nune’e, SEPS orienta  pontu fokál kada munisípiu hodi hala’o  identifikasaun  fó apoiu emerjénsia.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here