DILI, 18 janeiru 2020 (TATOLI) – Arsebispu Metropolitana Arkidioseze Dili, Mgr. Virgílio do Carmo da Silva, SDB, husu ba lider nasionál sira atu hatudu vontade di’ak hodi tuur hamutuk buka dalan ba rezolve situasaun polítika rai laran.
Notísia Relevante : Molok Foti Desizaun, Xefe Estadu Sei Konsulta Titulár Órgaun Soberania Sira
“Ita hotu husu atu parte hotu-hotu atu solusiona tiha problema ne’e tanba situasaun ba atrapalla ita povu nia moris hotu,” hateten Bispu Virgílio do Carmo da Silva, hodi responde jornalista sira, ohin, iha Centro Convenção Dili (CCD) hodi hato’o nia opiniaun kona-ba Orsamentu Jerál Estadu (OJE) 2020 ne’ebé la pasa iha Parlamentu Nasional (PN).
Bispu Virgilio husu atu lider polítiku sira presiza halo diálogu ida hodi bele solusiona problema no solusaun ne’e tenke fó esperansa ba povu no mós iha korajen nafatin maske iha difikuldade oioin, otimizmu nafatin atu bele fó garantia ba povu.
Husi sorin seluk, Diretora Movimentu Foin-Sa’e Feto Timor-Leste (MOFFE), Yasinta Luzina hateten, OJE 2020 ho montante ne’ebé boot tebes maibé konsege hatún no hamenus duni.
Notísia Relevante : PM Taur Hein Desizaun PR Lú Olo
“Tuir ami-nia nia observasaun no análize haree katak prosesu no mudansa ne’ebé hala’o ladún korresponde ba ita-nia hakarak tanba iha área balu hanesan nesesidade báziku nian tende fó atensaun hanesan saúde, edukasaun hodi nune’e bele aloka tuir orsamentu ne’ebé adekuadu ba,” dehan diretora MOFFE.
Nia hateten, OJE 2020 nia prosesu hala’o kedas iha tinan kotuk 2019, nune’e iha inísiu relatóriu entrega ona ba Parlamentu Nasionál (PN) maibé retira tanba atu hadi’a fali orsamentu. Iha tinan ida ne’e submete fali no halo diskusaun maibé to’o la pasa iha PN.
Notísia Relevante : Proposta OJE 2020 La Pasa
Tuir nia haree, OJE la pasa sei implika ba buat rua mak primeiru fó implikasaun ba komunidade sira nia moris no seluk fali mak VIII Governu la hetan fiar hodi hala’o governasaun ida ne’e.
Nia dehan, tuir lei katak OJE la pasa ona, desizaun iha Prezidente Repúblika nia liman no nia husu tau interese nasaun no povu nian.
Jornalista : Osória Marques
Editór : Francisco Simões