Aprezentasaun no votasaun ikus ba OJE 2020 iha jeneralidade, iha PN. Imajen Tatoli/ Egas Cristóvão

DILI, 17 janeiru 2020 (TATOLI)—Proposta Orsamentu Jerál Estadu 2020 (OJE) la pasa iha jeneralidade iha plenária Parlamentu Nasionál, ohin. Rezultadu votasaun hatudu vota a-favór 13, kontra 15 no abstensaun 25.

Bankada sira iha Parlamentu Nasionál (PN) ne’ebé vota a-favór maka hanesan partidu PLP, KHUNTO no partidu aliadu sira seluk. Enkuantu, partidu FRETILIN kontra no partidu CNRT vota abstensaun.

Entretantu, Primeiru-Ministru, Taur Matan Ruak hateten situasaun iha PN hatudu dala ida tan katak jestaun Estadu hasoru difikuldade.

Nia husu ba ema hotu atu hakmatek nune’e fó dalan ba líder sira atu buka solusaun ba problema ne’ebé oras ne’e Estadu hasoru.

“Husu sidadaun atu kontinua depozita konfiansa ba órgaun Estadu sira,” nia informa.

Taur esplika katak agora ba oin Estadu ida-ne’e sei la’o ho orsamentu duodésimu hodi hein orsamentu normál.

Hatán ba rezultadu votasaun ne’e, Deputadu Kmanek Haburas Unidade Nasionál Timor Oan (KHUNTO), Luís Roberto, argumenta nia vota a-favór tanba fiar katak orsamentu ida-ne’e atu hadi’a povu nia moris.

“Ha’u vota a-favór tanba orsamentu ida ne’e atu hadi’a povu nia moris”, Deputadu Luís Roberto ho lian maka’as hafoin rona rezultadu votasaun la pasa, iha PN, tersa ne’e.

Nune’e mós, Deputada KHUNTO, Olinda Guterres, sente arrepende tanba orsamentu ne’e la liu hela de’it.

“Se uluk mak ha’u hatene karik, ha’u sei la mai hamutuk ho imi. Loron ida imi presiza ami, ami sei fila kotuk”, deputada KHUNTO ne’e argumenta.

Iha parte seluk, Xefe Bankada Parlamentár FRETILIN, Aniceto Guterres, hateten orsamentu 2019 laiha investimentu no la hadi’a povu nia moris.

“Ho ezekusaun 2019 ne’ebé boot maibé la hadi’a povu nia moris. VIII Governu promete kria empregu no empregu hira mak kria ona iha Timor-Leste? Afinál hanesan mehi de’it. Nunka foti polítika atu hetan osan ba Estadu ida-ne’e no la hasai povu hosi ki’ak no mukti. Orsamentu ida-ne’ebé la serve. Tanba ne’e, bankada FRETILIN vota kontra orsamentu”, nia deklara.

Aniceto haktuir, FRETILIN haree estrutura orsamentu la responde ba povu nia moris no Oitavu Governu mantein ho reforma fiskál falladu hodi halo kontente de’it AMP.

Aleinde ne’e, Xefe Bankada Uniaun Demokrátika Timorense (UDT), Francisco Xavier Carlos, hateten interese nasionál tenke aas liu buat hotu.

“Osan boot ne’e bele fó retornu nune’e bele substitui fundu mina-rai. Tinan ba tinan Governu halo dívida. Ha’u preokupa tebes ba jerasaun sira tuir mai. Ne’e duni, tenke tau interese nasionál mak boot liu hotu. Ita bele diferensa ideia polítika maibé tau interese nasionál ba buat hotu”, nia argumenta.

Proposta foun OJE 2020 ne’ebé la pasa ne’e ho montante biliaun $1,668. Orsamentu biliaun $1,668 kompostu hosi sálariu no vensimentu millaun $235,6, sasán no serbisu millaun $561,8, transferénsia públika millaun $329,706, kapitál menór millaun $31,548 no kapitál dezenvolvimentu millaun $488,837.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here