Prezidente Repúblika, Francisco Guterres Lú Olo. Imajen Mídia PR

DILI, 18 janeiru 2020 (TATOLI)–Molok uza kompeténsia hodi foti desizaun ba situasaun atuál, Prezidente Repúblika (PR), Francisco Guterres Lú Olo sei Konsulta ho titulár órgaun soberania sira iha tempu badak. 

Xefe Estadu hato’o asuntu ne’e, hafoin partisipa enserramentu kongresu Conselho Nacional da Juventude Timor-Leste (CNJTL) ba dalimak iha Centro Convencões de Dili, ohin

“Ha’u sei hasoru titulár órgaun soberania, liuliu ho Primeiru-Ministru iha tempu badak atu haree kona-ba Orsamentu Jerál Estadu ne’ebé la pasa iha Parlamentu Nasionál atu hakat liu impase polítika. Seidauk iha desizaun atu hakotu situasaun polítika ne’e, maibé sei iha tempu atu hasoru malu ho titulár órgaun soberania hodi rona hanoin sira hodi ultrapasa situasaun polítika atuál hodi lori Timor-Leste ba oin”, PR Lu Olo tenik

Kona-ba orsamentu sei la’o ho duodésimu, Prezidente Repúblika hateten katak nia iha ajenda rasik hodi haree asuntu ida-ne’e.

“Ho duodésimu ita halo saida ba ekonomia Timor-Leste no halo saida ba povu nia moris. Prezidente Repúblika sei asume ida-ne’e. Ha’u iha ajenda rasik atu halo enkontru ho titulár órgaun soberania, liuliu ho Primeiru-Ministru atu haree asuntu ida-ne’e”, Prezidente Repúblika haktuir.

Maski Orsamentu Jerál Estadu 2020 la liu iha Parlamentu Nasionál, maibé Prezidente Repúblika deklara katak Taur Matan Ruak kontinua nafatin nu’udár Primeiru-Ministru.

Entretantu, votasaun ba jeneralidade Orsamentu Jerál Estadu (OJE) 2020 horisehik ne’ebé aprezenta husi Primeiru-Ministru la pasa iha Parlamentu Nasionál ho votus kontra 15, abstensaun 25 no a-favór 13.

Antes ne’e, Primeiru-Ministru (PM), Taur Matan Ruak hateten, desizaun hotu iha Prezidente Repúblika, Francisco Guterres Lú Olo nia liman.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here