Operasaun Konjunta ne'ebé inisia husi KAK ba veíkulu Estadu ne’ebé halo movimentu iha loron ferias, Sábadu ho Domingu. Imajen/Espesiál KAK

DILI, 14 janeiru 2020 (TATOLI) – Ministériu Públiku (MP) liuhusi nia alegasaun final, ohin, solisita ba iha tribunal atu aplika prizaun fulan neen no suspende ba tinan ida ba arguido ho inisiál BG, tanba utiliza patrimóniu Estadu (motor) iha  fora oras servisu no loron domingu.

Notísia Relevante : Uza Karreta Estadu Iha Domingu, Tribunál Aplika Multa $360 Ba Arguido

Prokuradór Jacinto Babo salienta katak arguido BG konfesa imparsiál ba faktu, katak motor roda kuak maka nia lori ba taka roda iha ofisina iha loron domingu atu uza ba servisu iha loron segunda.

“Ha’u hanoin arguido rekoñese nia hahalok ne’ebé mak la di’ak hodi la halo tan iha futuru, nune’e mak MP solisita ba iha tribunal atu aplika prizaun fulan neen suspende tinan ida,” hateten Prokuradór Jacinto Babo iha audiénsia julgamentu iha Tribunal Distritál Dili.

Husi parte defeza ne’ebé fó asisténsia legal ba arguido  solisita atu aplika pena multa, tanba haree mós ba iha arguido nia funsaun hanesan funsionáriu iha saláriu ne’ebé sufisiente atu selu multa no konsidera aplika pena suspensaun husi MP, bele prejudika arguido bainhira komete tan krime ruma, ho nune’e husu atu aplika pena multa.

Notísia Relevante : KFP Sei La Tolera Pesoál Uza Karreta Estadu Tula Família Iha Loron Feriadu

Iha sala julgamentu arguido deklara katak, faktu ne’ebé iha balun loos no balun laloos. Nia deklara katak, nia utiliza duni motor iha loron domingu, tanba roda kuak nia lori ba taka iha ofisina, maibé la’ós uza hodi ba pasiar.

Arguido deklara, arrepende nia hahalok, promete iha futuru sei la halo tan.

Tuir akuzasaun MP katak iha loron 20 juñu 2019, tuku 14:00 Otl, ekipa konjunta ne’ebé kompostu husi Komisaun Anti Korrupsaun (KAK), Polisia Nasional Timor Leste (PNTL), Diresaun Nasional Transporte no Terrestre (DNTT), Diresaun Nasional Patrimóniu Estadu (DNPE), halo hela operasaun ba karreta no motor Estadu ne’ebé sirkula iha loron sabado no domingu iha Dili laran.

Iha operasaun nee ekipa konjunta hapara motorizada ho marka HONDA REVO FIT, xapa matrikula 9430 G, ne’ebé kondús husi arguido hodi identifika no haree katak arguido nu’udar funsionáriu iha Ministériu Edukasaun utiliza motor refere la hetan autorizasaun husi nia diretór ka  ierarkia. Tanba nee, MP arguido ba iha krime Pekulatu ba Uzu ne’ebé previstu iha artigu 296 husi KP.

Rona tiha husi parte rua, tribunal adia julgamentu ba iha loron 30 janeiru, tuku 14:00  Otl, hodi rona leitura sentensa.

Audiénsia julgamentu nee, prezide husi Juiz Singulár Sribuana da Costa, Ministériu Públiku reprezenta husi prokuradór Jacinto Babo, arguido hetan asisténsia legal husi Defensor Públiku.

Notísia Relevante : Funsionáriu MTK Na’in Tolu Uza Karreta Estadu Halo Atividade Ilegál

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here