Prezidente TLPU, Francisco Belo Simões da Costa foto hamutuk ho Lauredu Nobel ba Pás nian, José Ramos Horta ho Diretór CEFTEK, Luis Evaristo ne'ebeé reprezenta SEKOMS iha abertura kongresu TLPU ba dalimak iha Otél Golgota, Dili, sesta (20/12/2019). Imajen/Egas Cristovão

DILI, 20 dezembru 2019 (TATOLI)-Timor-Leste Press Union (TLPU) hanesan organizasaun mahan ba jornalista iha Timor-Leste no membru ativu ba IFJ (International Federation of Journalists) iha papél importante  tebes atu kontinua halo akompañamentu no fó advokasia ba nia membru profisionál jornalista sira ne’ebé kompañia mídia sira kontinua halo violasaun no ‘esplorasaun’ ba sira nia direitu hanesan traballadór.

Notísia Relevante : TLPU Partisipa iha Kongresu Jornalista Mundiál

Lia hirak ne’e afirma husi Prezidente TLPU, Francisco Belo Simões da Costa, iha nia diskursu iha ámbitu kongresu TLPU ba dalimak ho tema “Papél TLPU iha Prosesu Dezenvolvimentu” ne’ebé hala’o iha salaun Otél Golgota, Comoro, Dili, ohin.

Francisco Belo Simões nia observasaun katak, durante ne’e no to’o ohin loron, instituisaun mídia sira kontinua pratika ‘esplorasaun’ no violasaun ba jornalista sira nia direitu, liuliu la iha kontratu traballu, la konsidera jornalista hanesan traballadór sira nia over time no piór liu tan  hola desizaun demite jornalista sira sem justa kauza.

Notísia Relevante : TLPU Solidariza Jornalista Maria Ressa

“Ita tenke onestu iha nee katak ho membru TLPU atus tolu resin ne’ebé servisu namkari iha media privadu, media públiku no ajénsia internasionál sira, lori dezafiu mós mai ita, liuliu oinsá ita atu fó advokasia ba sira intermus nia  direitu tomak hanesan traballadór profisionál,” hateten Francisco Simões

Ba media públiku ho Ajénsia internasionál sira, nia hafirma tan, TLPU la du’un preokupa, tanba orientasaun servisu tuir nia regra no prosedimentu ne’ebé justu  no tuir Lei. Dezafiu  ba TLPU mak jornalista sira ne’ebé servisu ba mídia privadu.

“Ita iha esperiénsia balun ona, ita halo akompañamentu no advokasia ba ita nia membru jornalista sira nia kazu balun ne’ebé instituisaun mídia sira viola sira nia direitu, hanesan traballadór.  Ita nia maluk balun, instituisaun mídia sira hasai sem justa kauza. Ita nia maluk balun servisu iha presaun nia laran, ita nia maluk sira balun servisu iha esplorasaun nia laran, servisu ho saláriu mínimu tebes purvolta $120,00- $400,00. Ita sira jornalista moris iha kondisaun ne’ebé minima tebes. Presaun servisu maka’as la balansu ho direitu ne’ebé merese ba ita,” hateten Francisco Simões.

Notísia Relevante : Jornalista Nain Tolu Keixa GMN Ba SEFOPE

Situasaun sira ne’e hotu, tuir nia,  dezafiu boot no responsabilidade ba TLPU atu kontinua akompaña no kontinua fó advokasia ba kualkér violasaun sira ne’ebé instituisaun mídia sira halo ba jornalista sira.

“Ita hatene no konsiente katak ita servisu ba ema no ba ema nia empreza privadu, to’o tempu ema sei hasai ita. Normal. Maibé, hasai ida la ho justa kauza no la tuir  regra ka Lei Traballu nian, ida ha’u bele deklara katak, responsabilidade TLPU nian mós,” afirma Francisco Simões.

Ba  profisionál jornalista sira,  nia husu atu merese kumpre no obedese mak dedikasaun servisu totalmente,  hadomi nia servisu no nia profisaun, fó laran ba servisu, kontinua kapasita-an iha dezenvolvimentu mundu digital ohin loron.

Notísia Relevante : Eis Jornalista GMN Ejije Direitu Indemnizasaun

Antes ne’e, nia rekoñese dezde tinan barak nia laran, TLPU eziste to’o mai ohin, hanesan organizasaun  enfrenta dezafiu oi-oin. Limitasaun rekursu umanu, limitasaun fasilidade, la iha fundu. Maibé, ho membru tomak nia vontade hotu, ho  nia dedikasaun hotu, dezafiu sira ne’e tau sees tiha. Mezmu serve ba organizasaun ho voluntáriu.

“Ita bele garante ita nia membru ne’ebé partisipa iha ne’e ho total jornalista puru nain atus tolu-liu. Sira hala’o sira nia knar profisionál iha órgaun komunikasaun sosiál ne’ebé eziste iha ita nia rain, inklui maluk sira ne’ebé sai korrespondente  ba ajénsia internasionál sira; REUTERS, EPA, AP, ABC, no seluk-seluk tan. Ita barak liu tan dezafiu mós barak ba bei-beik. Ita tenke solidu no iha vontade atu luta nafatin ba ita jornalista sira nia direitu ho dignu,” hateten Francisco Simões.

Ba dala ikus nian la haluha hato’o obrigadu boot tebes ba hotu-hotu nia partisipasaun iha semináriu no kongresu TLPU nian ba da-limak ne’e hodi hotu-hotu tau neon ba malu no tau hanoin hamutuk lori TLPU ba oin ho di’ak liu no serve interese membru sira nian.

Iha biban ne’e, reprezentante Sekretáriu Estadu Komunikasaun Sosiál (SEKOMS) ne’ebé reprezenta husi  Diretór CEFTEK, Luis Evaristo Soares hateten, liberdade imprensa ne’ebé konsagra iha konstituisaun RDTL iha artigu 41 katak atu alkansa nesesidade fundamentu no hasa’e kualidade moris povu nian. Nune’e, presiza atu garante independénsia órgaun komunikasaun sosiál nian no akumula públiku nia direitu atu hetan informasaun ho loloos.

“Jornalista Timor-Leste presiza baze morál no étika professional hanesan matadalan hodi hatudu integridade profisionalizmu ba públiku  no mós tenke respeita lei komunikasaun sosiál no kode étiku,” hateten Luis Evaristo Soares.

Polítika oitavu konstitusionál liuhusi SEKOMS, Luis Evaristo esplika,  iha kompromisu ida katak kontinua asegura liberdade no independénsia ba mídia privadu no públiku hasoru podér polítiku no podér ekonómiku no  garante labele iha monopóliu iha komunikasaun sosiál.

Partisipa iha  Kongresu TLPU ba loron dahuluk nian, ohin, Laureadu Novel da Paz, José Ramos Horta, ne’ebé sai hanesan oradór prinsipál,  Prezidente TATOLI.IP,  José da Costa, reprezenta SEKOMS, estrutura tomak TLPU nian no  Jornalista Timor-oan sira ne’ebé sai membru ba TLPU.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here