Vise Prezidente Timor-Leste Press Union (TLPU), Jordão Henrique partisipa iha kongresu jornalista mundiál ne'ebé organiza hosi IFJ iha Tunísia, tersa (11/6/2019). Imajen espesiál

TUNIS, 12 juñu 2019 (TATOLI)—Timor Leste Press Union (TLPU) hanesan organizasaun mahon ba profisionál jornalista timoroan sira nian, partisipa iha Kongresu Mundiál Jornalista ne’ebé organiza hosi IFJ (International Federation of Journalist).

Kongresu jornalista mundiál ba tinan ne’e hala’o iha sidade Tunis, Repúblika Tunísia, iha loron 11 juñu 2019, ne’ebé partisipa ativu hosi membru IFJ nian, inklui TLPU ne’ebé reprezenta hosi Vise Prezidente TLPU, Jordão Henrique.

Kongresu ba dala-XXX  ho lema “BA LIBERDADE JORNALISTA” ne’e, partisipa hosi reprezentante organizasaun jornalista sira nian ne’ebé sai nu’udar membru IFJ kuaze 300 ne’ebé mai hosi nasaun 120, inklui Timor-Leste.

Durante kongresu ba loron dahuluk nian halo diskusaun ne’ebé foka liu-ba iha futuru jornalizmu nian, hasoru teknolojia dijitál, no mós problema balun ne’ebé sei akontese hela ba iha kuaze Uniaun Jornalista iha mundu.

Aleinde ne’e, foka mós ba situasaun jornalista no mós mídia nian, iha nasaun hirak ne’ebé mak akontese hela revolusaun no instabilidade.

Kongresista sira mós fó onra  ba partisipasaun jornalista feto nian hosi nasaun Arabia sira hanesan Irake, Suria no mós Yaman ne’ebé mak fó ona kontribuisaun oinsá mak dezenvolve serbisu jornalista no mós mídia iha kontestu transparénsia no neutralidade.

TLPU sai membru permanente ba IFJ iha tinan 2016 no tinan ne’ebá ofisiálmente IFJ simu adezaun TLPU nian iha kongresu IFJ ba dala-XXIX ne’ebé hala’o iha Fransa, ne’ebé partisipa diretamente hosi eis prezidente TLPU, José António Belo.

 

Kontribuidór: Jordão Henrique

 Edisaun: Francisco Simões

HAKEREK NO HATÁN

Please enter your comment!
Please enter your name here