Jornalista GMN nain tolu ne'ebé GMN hasai lori sira nia karta ba halo keixa iha SEFOPE, segunda (02/12/2019). Imajen/Domingos Piedade

DILI, 10 dezembru 2019 (TATOLI)-Eis Jornalista Grupu Mídia Nasionál (GMN) na’in tolu maka Julito Ximenes, Carmelita Isaac no Evaristo Mariz ne’ebé foin lalais hetan demisaun husu ba kompaña atu selu indimnizasaun tanba kontribui ona servisu ba instituisaun ne’e durante tinan barak.

Ejijensia ne’e hato’o hosi Eis Jornalista Julito Ximenes bainhira partisipa prosesu mediasaun ne’ebé halo tersa ohin, entre Sekretáriu Estadu Formasaun Profesionál no Empregu (SEFOPE), Na’in ba Kompaña GMN ne’ebé reprezenta hosi Diretór Informasaun, Francedes Suni ho Jornalista Na’in tolu iha salaun SEFOPE Caicoli.

Notísia Relevante:Jornalista Nain Tolu Keixa GMN Ba SEFOPE

“Ami hakarak buat ne’ebé merese duni ba ami. Tanba ne’e parte GMN sei ba akumula faktus hotu kona ba loron férias Nasionál ka over-time,”dehan Jornalista,  Julito Ximenes,  ba TATOLI ohin.

Durante prosesu mediasaun la’o parte  tolu  konkorda sei kontinua halo mediasaun ikus iha loron 20 fulan-dezembru 2019 tanba kompaña sei verifika dadus kona-ba loron feriadu no overtime sira molok halo indeminizasaun.

Notísia Relevante:SEFOPE Notifika Ona Diretór GMN Ba Kazu Jornalista Nain Tolu

“Durante períodu servisu ha’u ho Carmelita Isaac kuaze tinan 5 ona no kolega Evaristo Mariz servisu tinan rua-resin, ami na’in tolu servisu iha ne’ebá,” Eis jornalista ne’e hatutan.

Tuir nia katak bainhira kompaña la selu indiminizasaun maka eis jornalista GMN na’in tolu ne’e sei lori kazu refere  ba prosesa tuir dalan justisa.

“Ami ejije no husu ami-nia direitu loloos,tanba sira (GMN) ohin dehan prontu fó overtime no loron férias nian maibé hira no seidauk hatete nia númeru osan,”nia esplika.

Iha tempu hanesan Jornalista TATOLI koko halo entrevista ho Diretór Informasaun GMN, Francedes Suni maibé rezeita fó komentáriu.

Jornalista:Osória Marqués

Editór   :Francisco Simões

 

 

 

 

HAKEREK NO HATÁN

Please enter your comment!
Please enter your name here