Jornalista GMN nain tolu ne'ebé GMN hasai lori sira nia karta ba halo keixa iha SEFOPE, segunda (02/12/2019). Imajen/Domingos Piedade

DILI, 02 dezembru 2019 (TATOLI) – Jornalista Grupo Media Nacional (GMN) nain tolu, ohin halo keixa ba Diresaun Nasionál Relasaun ba Traballu (DNRT), Departamentu Mediasaun no Konsiliasaun iha Sekretaria Estadu Formasaun Profisionál no Empregu (SEFOPE) hodi kontesta desizaun GMN ne’ebé hapara sira hosi servisu.

Jornalista nain tolu ne’ebé halo keixa mak Julito Ximenes, Carmelita Isaac, Evaristo Mariz, tanba konsidera desizaun hasai sira la justu no la korresponde ba razaun ne’ebé mak mensiona iha karta hapara servisu ba sira no mós artigu 45 Lei do Traballu, nu.4/2012 de 21 de Fevereiru.

Ba jornalista Julito Ximenes nia kauza tanba hala’o dupla funsaun, maibé Julito rasik halo ona karta auto-defeza hodi  husu evidénsia maibé GMN la responde karta.

Ba jornalista Carmelita Isaac, GMN deside hasai nia hosi servisu tuir karta ne’ebé asina hosi Nivio Freitas nu’udar Diretór Rekursu Umanu  GMN ho Fransedes Suni, nu’udar Diretór Informasaun GMN, dezobediénsia ba ierarkia. Nune’e, Carmelita mós halo ona karta auto defeza hodi husu justifikasaun  no avaliasaun dezempeñu. Maske nune’e, to’o ohin loron GMN la halo resposta.

Ba jornalista Evaristo Mariz, GMN hola desizaun hasai nia hosi servisu tanba razaun ne’ebé GMN aprezenta iha karta ho N/Ref 03/Adm.DAFRH-GMNTV/X/19, katak komete violasaun repetitivu hasoru regra jornalizmu nian. Nune’e, Evaristo Mariz  mós uza nia direitu de onra hodi resposta ba karta ne’e hodi husu aprezenta faktu ba sala sira ne’ebé GMN mensiona. Maibé, GMN la halo resposta.

“Ami husu ba ami nia organizasaun jornalista Timor-Leste Press Union (TLPU) hodi bele fó advokasia ba ami, lori ami nia kazu ne’e ba oin. Nune’e, ohin ami mai SEFOPE hodi hatama keixa atu SEFOPE bele halo mediasaun ba ami nia kazu ne’e. Tanba ami konsidera desizaun GMN nian hasoru ami la justu, tanba sira la aprezenta ami nia sala ruma hodi hasai ami,” hateten Julito Ximenes ba jornalista sira hafoin hatama keixa iha SEFOPE, Caicoli, Dili.

Julito Ximenes, hahú servisu iha GMN nu’udar jornalista iha 2015 ne’e aprofunda karta hapara servisu ne’ebé fó ba sira nain tolu ida-idak iha loron 31 Outubru 2019 hodi hapara kedas servisu iha loron 30 Novembru 2019 la fundamentu. Tanba iha karta ne’e nunka aprezenta faktu ba akuzasaun sira ne’ebé GMN halo ba sira ida-idak.

“Ha’u bele dehan ami nain tolu ne’e sai vítima hosi inkapasidade Diretór Rekursu Umanu, Nivio Freitas  ho Diretór Informasaun GMN, Fransedes Suni, tanba sira nain rua hasai ami la iha prova ka evidénsia kona-ba ami nia sala. San tan, sira la aprezenta ami nia avaliasaun dezempeñu,” afirma Julito Ximenes.

Tuir nia, durante tinan barak sira servisu iha GMN nunka simu xamada verbal no eskrita kona-ba komportamentu no dezempeñu servisu.

Jornalista halo entrevista ho Vise Prezidente TLPU, Jordão Henrique, hafoin akompaña jornalista GMN nain tolu ne’ebeé halo halo keixa iha SEFOPE. Imajen/Domingos Piedade

Iha biban hanesan, vise prezidente TLPU, Jordão Henrique, ne’ebé akompaña jornalista GMN nain tolu halo esklarese TLPU hanesan organizasaun mahan ba jornalista sira, liuliu fó advokasia ba jornalista hanesan traballadór  hodi akompaña no fasilita jornalista GMN nain tolu ne’e atu bele hetan mediasaun ba sira nia kazu.

“Semana rua antes, jornalista nain tolu ne’e hato’o ona pedidu  ba TLPU atu akompaña sira nia kazu no sira mós husu atu oinsá TLPU fasilita buka dalan. Tanba ne’e, TLPU dehan ba sira katak haknaar-án de’it ba to’o loron terminadu ona, 30 novembru 2019, kuandu la simu ona mak buka dalan seluk rezolve,”  hateten Jordão Henrique.

Jordão hateten, dalan ne’ebé justu liu ba TLPU mak lori jornalista nain tolu ne’ebé GMN hasai ne’e mai SEFOPE hodi rezolve tuir Lei Traballu.

Iha biban ne’e kedas jornalista sira ba to’o iha Edifísiu GMN, Bebora, Dili, atu halo konfirmasaun direta ho Diretór Informasaun GMN, Fransedes Suni, inklui Diretór Rekursu Umanu GMN, Nivio Freitas, maibé infelizmente Fransedes Suni la bele halo komentáriu ba kazu ne’e.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here