Ministra Soliedariedade Sosiál no Inkluzaun, Armanda Berta dos Santos, Sekretária Estadu Igualidade Jeneru no Inkluzaun, Maria José da Fonseca Monteiro de Jesus, ho Embaixadór Austrália mai Timor-Leste Peter Roberts, asina akordu subsidiária ba Programa Nabilan iha Salaun MSSI, Caicoli, Dili, sesta (22/11/2019). Imajen/Nelson de Sousa

DILI, 22  novembru 2019 (TATOLI)-Governu Australia apoiu millaun $35 ba Ministériu Solidariedade Sosiál no Inkluzaun (MSSI) hodi extende tan Programa Nabilan hodi hamenus violénsia kontra feto no labarik.

Programa Nabilan ne’e inisia ona iha 2014 no termina iha 2019. nune’e, ohin parte rua konkorda  extende tan to’o  2022 liuhosi akordu subsidiaria ne’ebé asina hosi Embaixadór Austrália mai Timor-Leste, Peter Roberts  ho Ministra Solidariedade Sosiál no Inkluzaun, Armanda Berta dos Santos, no Sekretária Estadu Igualdade Jéneru no Inkluzaun SEII (SEII), Maria José da Fonseca Monteiro de Jesus, iha salaun MSSI, Caicoli, Dili.

Notísia Relevante      : Governu TL Sei Asina Nota Entendimentu ba Programa Eliminasaun Violénsia Kontra Feto

“Austrália hanesan parseiru estratéjiku   ba dezenvolvimentu  hodi servisu hamutuk hodi fó protesaun ba  feto ho labarik sira,” hateten Ministra Armanda Berta dos Santos.

Notísia Relevante : Timor-Leste Iha Polítika Halakon Violénsia Kontra Feto

Ho apoiu ne’e, Governu garante sei  fó kontribuisaun maka’as ba prevene  no kombate krime kontra labarik no feto Timor-Leste.

Iha biban hanesan, Embaixadór, Peter Roberts, dehan, polítika hapara violénsia kontra feto no labarik sai nu’udar prioridade ba Governu Austrália  ba futuru.

Notísia Relevante : FOKUPERS Hakarak Orsamentu Espesífiku ba Asisténsia Feto no Labarik

Durante implementasaun programa ne’e hetan progresu boot tanba feto no labarik 32.000-resin maka hetan asisténsia legál, ezame médiku, akonsellamentu no alojamentu bainhira vítima sira sofre violénsia iha família no sosiedade nia leet.

Tuir estatístika hosi rezultadu peskiza Organizasaun Saúde Mundiál iha Timor-Leste iha 2015 hatudu feto porsentu 58 maka hetan violénsia fíziku hosi sira nia kaben no namoradu.

Fundu ba programa nabilan ne’e sei jere  hamutuk hosi Fundasaun Ázia, MSSI, SEII, Pradet, FOKUPERS, Casa Vida, ALFELA, Sistema Monitorizasaun Programa Judisiál (JSMP-sigla Inglés) no uma Mahon Salele.

 Jornalista  :Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here