DILI, 16 outubru 2019 (TATOLI) – Ministra Solidariedade no Inkluzaun, Armanda Berta dos Santos simu poder tomak atu asina akordu Subsidiáriu entre Governu Timor-Leste (TL) no Governu Federál Austrália, kona-ba Programa ba Eliminasaun Violénsia Kontra Feto iha Timor-Leste (NABILAN).
Ministru Estadu Prezidénsia Konsellu Ministru, Hermenegildo Augusto Cabral Pereira, informa reuniaun Konsellu Ministru rona aprezentasaun hosi Ministra Armanda Berta ba programa ne’e hodi bele implementa programa ba faze daruak.
“Konsellu Ministru apresia mós artikulasaun ne’e tanba hanesan programa importante tebes, maibé la’ós programa foun. Programa ne’e mai kedan hosi tinan 2014 to’o 2018 ne’ebé konsege implementa ona iha faze dahuluk no ida-ne’e ba faze daruak ho Governu Austrália”, tenik ministru Hermenegildo iha Palásiu Governu, kuarta ne’e.
Enkuantu, totál finansiamentu ba programa ne’e hosi Governu Austrália hamutuk millaun $35, nune’e bele konklui faze daruak-nian.
Akordu ida-ne’e sei selebra iha konformidade husi Memorandu Entendimentu ne’ebé asina ona husi parte rua iha tinan 2003 no sei substitui akordu anteriór ne’ebé asina ona iha tinan-2014 no sei implementa to’o fulan-juñu 2022.
Programa NABILAN servisu hodi hasa’e kualidade ba apoiu no asesu ba justisa, enkuantu objetivu husi programa ne’e atu garante ba feto no labarik iha Timor-Leste, inklui mós grupu marjinalizadu hanesan ema ho defisiénsia atu labele hela iha situasaun violénsia nia laran no bele kontribui ba dezenvolvimentu nasaun ne’ebé forte.
Jornalista: Hortençio Sanchez
Editór: Xisto Freitas
