Diretora FOKUPERS, Maria José Guterres. Imajen/TATOLI

DILI, 30 setembru 2019 (TATOLI) – Ekipa Organizasaun Naun-Govementál, Fórum Komunikasaun ba Feto Timor-Leste (FOKUPERS) hasoru malu ho Primeiru-Ministru (PM), Taur Matan Ruak, hodi ko’alia kona-ba oinsá bele prevee orsamentu 2020 hodi haforsa liu tan servisu kombate violénsia doméstika hasoru feto no labarik. 

“Ohin ami ko’alia ho Primeiru-Ministru atu haree kona-ba orsamentu ne’ebé espesífiku ba asisténsia feto no labarik sira ne’ebé sai vítima ba violénsia doméstika no seluk tan” tenik Diretora FOKUPERS, Maria José Guterres.

Nia dehan, bazeia ba kompromisu Governu-nian ba dezenvolvimentu nasionál iha responsabilidade atu banati tuir.

“Ita haree bazeia ba planu asaun nasionál ba violénsia bazeia ba jéneru, Governu iha kompromisu atu hatúr responsabilidade atu banati tuir planu asaun nasionál bazeia ba jéneru-nian ne’ebé mak relasiona ho Lei Kontra Violénsia Doméstika no haree mós ba planu asaun nasionál ba labarik ninian”, Maria José akresenta.

Nia haktuir, hahú hosi 2016 to’o 2020 Governu iha ona obrigasaun atu garante labarik hotu nia saúde no mental di’ak liu.

Nune’e, FOKUPERS konsidera importante atu prevee orsamentu espesífiku atu fó apoiu ba atividade organizasaun ne’e.

Bazeia ba análiza ne’ebé iha, kada tinan FOKUPERS presiza osan $1.615.374, maibé iha tinan kotuk Governu prevee orsamentu $382.184 ba FOKUPERS.

Maria José subliña, nia parte seidauk hatene montante hira mak Governu aloka ba tinan oin.

“Kona-ba orsamentu 2020 nian ami seidauk hatene loloos. Maibé kuandu osan la to’o entaun ami sei buka meiu hosi doadór sira atu aumenta”, nia dehan tan.

Biban ne’e, Xefe Governu fó hanoin mós ba organizasaun ne’e atu hala’o servisu ho di’ak  nune’e bele fó benefísiu ba povu.

Kada tinan FOKUPERS fó ona asisténsia ba ema ne’ebé presiza apoiu hamutuk 1.845.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here