Operasaun Konjunta ne'ebé inisia hosi KAK ba veíkulu Estadu ne’ebé halo movimentu iha loron ferias, Sábadu ho Domingu. Imajen/Espesiál KAK

DILI, 03 outubru 2019 (TATOLI) – Operasaun konjunta ba karreta Estadu ne’ebé hala’o husi Komisaun Anti Korrupsaun (CAC-sigla portugés), Polisia Nasionál Timor-Leste (PNTL), Diresaun Nasionál Transporte no Terrestre (DNTT), ho Patrimóniu Estadu, iha loron feriadu no sábadu-domingu, nia relatóriu finál entrega ona ba Komisaun Funsaun Publika (CFP-sigla portugés).

Notísia Relevante : Ekipa Operasaun Konjunta Ba Karreta Estadu Entrega Relatóriu ba KFP

Adjuntu Komisáriu  KAK ba Asuntu Prevensaun no Sensibilizasaun, Luis Oliveira de Sampaio, informa,  pontu fokál Operasaun Konjunta (OK) nian entrega ona relatóriu finál husi rezultadu operasaun ba Komisáriu KFP ba asuntu Disiplinár António Freitas, iha semana kotuk.

Ba Ajénsia TATOLI, via telefónika, kuarta (02/10/2019), Adjuntu KAK Luis Oliveira de Sampaio, hateten, operasaun ba patrimóniu Estadu nian durante fulan tolu (3) nia laran hetan apresiasaun aas husi entidade Timorense tomak.

Notísia Relevante : Operasaun Konjunta “Prende” Viatura Estadu 60

Nia hatutan, funsionáriu públiku ne’ebé tama iha infrasaun simu ona sira ninian konsekuénsia no prosesa ona tuir prosesu legal iha Tribunal Distritál Dili. Maske nune’e, ho relatóriu finál operasaun konjunta nian ne’e sei hatodan tan infrasór sira iha prosesu disiplinár ne’ebé KFP sei hasai.

Notísia Relevante : Uza Karreta Estadu, Tribunal Julga Konsultór ADN

Iha relatóriu nee mós elabora serbisu operasaun konjunta nia progresu, dezafiu hodi rekomenda ba KFP atu koordena ho instituisaun relevante sira, atu oinsá mak kada ministériu bele kontrola sira nia rekursus liuliu veíkulu Estadu nian.

Antes nee mós, pontu fokál KAK Euclides Madeira informa, iha operasaun durante fulan tolu ne’e, ekipa operasaun konjunta konsege prende karreta Estado hamutuk 38 no motorizada 88 iha linhas ministeriais sira.

Prosesu investigasaun no legál ba infrasór sira oras hala’o hela no julgamentu balun sei iha tribunal no desizaun tribunal nian ba kontra bandu sira mós definitive ona.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here