Adjuntu Komisariu KAK, Alexandre Freitas. Imajen/Domingos Piedade

DILI, 16 setembru 2019 (TATOLI) – Pontu fokál Operasaun Konjunta ba karreta Estadu iha loron férias no sábadu ho domingu, entrega relatóriu final  ba Komisaun Funsaun Públiku (CFP-sigla portugés) liu husi Komisáriu ba asuntu disiplinár Antonio Freitas.

Notísia Relevante : Operasaun Konjunta “Prende” Viatura Estadu 60

Ekipa konjunta ba operasaun karreta Estadu ne’e , kompostu husi Komisaun Anti Korrupsaun (CAC-sigla portugés), Polisia Nasional Timor-Leste (PNTL), Diresaun Nasional Transporte no Terrestre (DNTT) ho mós Patrimóniu Estadu.

Liu husi publikasaun ofisiál  iha kronolojia Facebook KAK nian haktuir katak, serimónia entrega relatóriu finál  ne’e hala’o iha Edifísiu KFP, Matadoru, Dili, sesta (13/9/2019).

Operasaun Konjunta ho alvu ba karreta no motorizada Estadu nian sirkulasaun iha sábadu, domingu no  fora oras servisu nee hala’o durante fulan tolu (3) hetan apresiasaun aas husi entidade Timorense tomak.

Funsionáriu Públiku ne’ebé tama iha infrasaun simu ona sira ninian konsekuénsia no prosesa ona tuir prosesu legal iha Tribunal Distritál Dili. Maske nune’e, ho relatóriu finál nee sei hatodan tan infrasór sira iha prosesu disiplinár ne’ebé KFP sei hasai bazeia ba relatóriu final Ekipa Operasaun Konjunta nian.

Pontu Fokál KAK nian Euclides Madeira hateten, ekipa operasaun konjunta konsege prende karreta Estadu hamutuk 38 no motorizada 88 iha liña Ministeriais sira.

Prosesu investigasaun no legál ba infrasór sira oras hala’o hela, julgamentu balun sei iha tribunal no desizaun tribunal nian ba kontra bandu sira mós definitivu ona.

Hafoin hato’o relatóriu ba KFP, pontu fokál sira sei tuur hamutuk fali hodi trasa planu atu operasaun konjunta kontinua nafatin iha futuru.

“Ekipa operasaun konjunta konsiente katak tenke kontinua halo nafatin operasaun  konjunta ba karreta Estadu ho motor Estadu ne’ebé hala’o atividade la’ós iha loron servisu,” hateten Euclides Madeira.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here