Vise Prezidente Parlamentu Nasionál, Maria Angelina Sarmento. Foto Tatoli/ Egas Cristóvão

DILI, 5 agostu 2019 (TATOLI)—Parlamentu Nasionál (PN) responde ona karta notifikasaun hosi Tribunál Rekursu (TR) kona-ba Alterasaun Estatutu Rejiaun Administrativa Espesiál Oé-Cusse Ambeno-Zona Espesiál Ekonomia Sosiál Merkadu (RAEOA-ZEESM).

“Ohin ha’u manda ona resposta ba Tribunál Rekursu. Parlamentu Nasionál mantein pozisaun, katak nomeasaun Prezidente Autoridade fó ba Governu no mandatu ne’e labele susesiva ka tutuir malu. Hafoin hotu tiha (mandatu), renova fali ka renova beibeik, maibé mandatu bele renova dala-ida de’it,” Prezidente Parlamentu Nasionál Interina, Maria Angelina Sarmento, ko’alia ba jornalista iha Parlamentu Nasionál, ohin.

Lee mós:

PN Simu Ona Notifikasaun TR Kona-ba Alterasaun Estatutu RAEOA-ZEESM

Alkatiri Konsidera Alterasaun Estatutu RAEOA Hatún Estatutu Oé-Cusse

Alterasaun Lei Númeru 3/2014, PM Mak Sei Pose Prezidente RAEOA

Nia esplika, baze hodi altera artigu rua ne’e, ida Governu mak fó pose no ida seluk mandatu ne’e mandatu susesivamente, maibé sofre iha alterasaun introdúz fali mandatu ne’e renovável (dala ida de’it).

“Ami-nia konkluzaun katak objetivu ne’e la’ós atu redúz kompeténsia Prezidente Repúblika, maibé kompeténsia ida atu nomea Prezidente Autoridade fó fila-fali ba Governu,” nia akresenta.

Tuir nia, Konstituisaun la temi Prezidente Repúblika mak iha kompeténsia atu halo nomeasaun ba Prezidente RAEOA.

“Hein katak Tribunál Rekursu bele foti desizaun ba klarifikasaun hosi Parlamentu nian, hodi haruka fali ba Prezidente Repúblika bele uza nia kompeténsia atu promulga ka vetu, bazeia ba kompeténsia polítika ne’ebé Prezidente Repúblika iha,” Maria Angelina esplika.

Atuál Vise Prezidente Parlamentu Nasionál ne’e hateten, se nia la’ós kompeténsia supra governamentál, entaun só Primeiru Ministru mak bele nomea no fó pose—la presiza tenke ba Prezidente Repúblika.

Kona-ba nusá mak Alkatiri nia mandatu besik ramata mak Parlamentu Nasionál foin halo alterasaun? “Labele. Mandatu la’o hela, ita halo alterasaun depois ita halo mudansa ne’e labele. Lei nia lala’ok mak hanesan ne’e duni. Kuandu nia mandatu atu hotu maka ita foin altera. Labele altera iha dalan klaran kuandu prosesu la’o hela,” nia hatán.

Foin lalais, Prezidente Repúblika, Francisco Guterres ‘Lú Olo’ haruka alterasaun lei refere ba Tribunál Rekursu no Tribunál Rekursu notifika Parlamentu Nasionál hodi fó razaun bazeia ba Konstituisaun artigu 71 ne’ebé Prezidente Repúblika argumenta.

Tuir artigu 71 kona-ba organizasaun administrativa, alínea dahuluk, hateten Oé-Cusse Ambeno hala’o nia kna’ar tuir Polítika Administrativa ho Rejime Ekonómika Espesiál. Alínea daruak hosi artigu ne’e esplika, Ataúro mós sei iha Estatutu Ekonómiku rasik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here