Sesaun plenária Parlamentu Nasionál. Imajen dok. Tatoli

DILI, 2 agostu 2019 (TATOLI) – Vise Prezidente Parlamentu Nasionál, Luís Roberto informa  Parlamentu Nasionál (PN) simu ona notifikasaun hosi Tribunál Rekursu (TR) kona-ba alterasaun Lei nú.3/2014, 18 juñu, kona-ba kriasaun Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM).

“Ami iha ona koñesimentu. Ami simu ona karta notifikasaun hosi Tribunál Rekursu iha 31 jullu. Sentidu karta ne’e dehan urjentimente atu fó resposta, tanba ne’e ami fó hatene tiha ona ba asesór sira hodi resposta fila-fali ba Prezidente Tribunál Rekursu”, tenik Luís Roberto ba jornalista sira iha PN, sesta ne’e.

Deputadu Bankada KHUNTO ne’e dehan, kontiúdu hosi karta notifikasaun ne’e bazeia Konstituisaun artigu 71 kona-ba Organizasaun Administrativa, tanba ne’e PN sei hato’o fila-fali ba Prezidente Tribunál Rekursu, Deolindo dos Santos.

Nia Informa, agora dadauk PN sei haree karta notifikasaun ne’e durante loron haat nia laran, hahú hosi 31 jullu hafoin iha segunda (5/8) sei haruka hikas ba TR.

“Ami labele hadi’a ona. Ami só resposta fila-fali de’it karta ne’ebé iha, tanba iha alterasaun ne’e la kontra buat ida. Ha’u fiar ita-nia Tribunál sei desidi tuir buat ne’ebé iha”, katak Luís Roberto.

Tuir konstituisaun artigu 71 kona-ba Organizasaun Administrativa, alínea 2, hateten Oé-Cusse Ambeno sei hala’o nia kna’ar tuir polítika administrativa ho rejime ekonómika espesiál.

Entretantu, iha loron 8 jullu PN halo alterasaun ba artigu 19 no 21 husi Lei nú.3/2014 18 juñu, ho votu a-favór 34, kontra 0 no abstensaun 0 no iha loron ne’e kedas manda ba Prezidente Repúblika, Francisco Guterres Lú Olo atu halo análiza no promulga iha loron 30 nia laran.

Iha votasaun ne’e, Bankada opozisaun ne’ebé kompostu husi Bankada FRETILIN, PD no PUDD la partisipa iha votasaun.

Kontiúdu artigu 19 kona-ba mandatu Prezidente RAEOA, hosi Lei nú.3/2014 18 jullu ne’ebé sofre alterasaun mak Prezidente Autoridade, tenke sidadaun timoroan ho idade pelumenus tinan 35, nomeadu hosi Prezidente Repúblika, sob-proposta hosi Primeiru Ministru, ba mandatu tinan lima, ho renovável susesivamente.

Artigu hanesan maibé la sofre alterasaun (mantein) mak, Prezidente Autoridade tenke fiksa rezidénsia abituál iha territóriu nasionál no la impede durante ezerse mandatu, atividade privada ne’ebé kauza hosi konflitu interese bainhira ezersísiu iha ninia funsaun no toma pose, Prezidente Autoridade tenke aprezenta deklarasaun bens ne’ebé iha patrimóniu ba Tribunál Rekursu, atu bele sai hanesan sujeitu rejime jurídiku aplikável ba titulár órgaun soberania sira.

Enkuantu, kontiúdu artigu 21 ne’ebé sofre alterasaun mak Prezidente Autoridade ezoneradu, iha kazu admitidu, hosi Prezidente Repúblika, sob-proposta hosi Primeiru-Ministru.

No, ikus liu, iha artigu hanesan mak Prezidente Autoridade tenke renúnsia hosi kargu kuandu inkapasitadu atu dezempeña ninia funsaun, ho motivu moras grave ka razaun seluk hanesan auzénsia ho tempu naruk.

Jornalista: Evaristo Soares Martins

Editór: Xisto Freitas

Notísia Relevante: 

AMP Altera Lei RAEOA-ZEESM, Opozisaun La Partisipa Aprovasaun

Prezidente RAEOA Foun Liu De’it Hosi Deliberasaun KM

HAKEREK NO HATÁN

Please enter your comment!
Please enter your name here