Sesaun plenária iha Parlamentu Nasionál. Imajen dok. Tatoli

DILI, 09 jullu, 2019 (TATOLI)- Deputadu sira husi bankada governu altera ona lei númeru 3/2014 kona-ba estatutu Rejiaun  Administrativa Espesiál Oecusse no Ambeno no Zona Espesial Ekonomia  Sosiál Merkadu (RAEOA-ZEESM), iha Parlamentu Nasionál (PN), tersa (08/07/2019).

Vise Prezidente Parlamentu Nasionál, Maria Angelina Sarmento. Foto Egas Cristovão

Vise Prezidente Parlamentu Nasionál (PPN), Maria Angelina Sarmento hateten, razaun deputadu sira halo alterasaun no aprovasaun ba lei númeru 3/2014 kona ba estatutu RAEOA-ZEESM) tanba atu define loloos kompeténsia propria Prezidente Repúblika nian ba fó pose ba órgaun estadu sira.

Tanba iha konstituisaun PR nian kompeténsia la atu fó pose ba prezidente RAEOA no  prezidente  RAEOA rasik la presiza simu pose husi PR tanba nee lei ne´ebé maka deputadu sira halo aprovosaun atu hatuur loloos kompeténsia própria prezidente tuir konstituisaun.

Tuir  vise PPN ne´e katak horseik (08/07/2019) deputadu sira altera lei númeru 3/2014 estatutu ba ba kriasaun RAEOA no ZEESM liliu halo alterasaun ba artigu rua maka hanesan iha artigu 19º ne´ebé ko´alia kona-ba rekizitu kandidatura  ba prezidente RAEOA nian ne´ebé maka antes ne´e seidauk halo altersaun ba artigu ne´e hateten ka vigora hela kanditatu ba prezidente RAEOA nian sidadaun Timor tenke idade 35 no nian mandatu renovavel no  susesivamente katak  mandatu hotu renova no mandatu hotu renova.

Maibé, projeitu lei ne´ebé mak horseik deputadu sira halo alterasaun ne´e lei númeru 3/2014 kona-ba rekizitu kandidatura ba prezidente RAEOA nian, sidadaun tenke ema timoroan rasik no idade mínimu 35 neebe mandatu ba périodu ida no mandatu renova dala ida.

Nia esplika liután katak alende deputadu sira halo alterasaun ba lei ne´e, deputadu sira ba artigu 21º husi lei kriasaun RAEOA- ZEESM nian ne´ebé maka antes vigora husi artigu ne´e deskreve katak prezidente RAEOA ne´e hetan aprovasaun no pose husi Prezidente Repúblika  liuhusi proposta primeiru-ministru nian.

Maibé komparasaun ho alterasaun lei horseik ne´e husi artigu 21º ne´ebé alteradu ne´e dehan katak simplesmente Primeiru Ministru (PM) mak aprova proposta nomeasaun no xefe governu rasik mak fó pose liuhusi rezolusaun ne´ebé governu halo.

Tuir eis-komisáriu CNE (Komisaun Nasionál Eleisaun-sigla portugés) katak razaun deputadu sira inisia hodi altera lei refere iha nian artigu balun tanba  bazeia ba relatóriu pareser ne´ebé husi komisaun A (Asuntu konstituisaun no justisa) nian.

“Relatóriu pareser ne´ebé husi Komisaun A dehan katak tuir konstituisaun prezidente autoridade ne´e la presiza  prezidente repúblika maka atu aprova no  fó pose ba nia,” Vise PPN Maria Angela Sarmento ba jornalista sira hafoin plenária iha Parlamentu Nasionál, tersa (09/07).

Tanba tuir reprezentante povu ne´e katak konstituisaun define klaru ona kompeténsia  PR nian atu nomeia no fó pose ba se se no konstituisaun la temi prezidente autoridade sira.

“Se konstituisaun la temi ida ne´e entaun  signifika tinan lima liu ba  sira propoint proposta de lei ida ne´e ita hala´o ona maibé depois implementasaun ita haree katak iha buat balun ke la la´o tuir konstituisaun nia hakarak”.

“Tanba ne´e maka proposta ne´e mai husi Komisaun A atu halo alterasaun para ba oin se de´it maka atu sai prezidente autoridade iha RAEOA-ZEESM nian la presiza lori ba prezidente repúblika atu hetan pose. Maibé ne´e kompeténsia eskluziva governu nian,” tenik Vise Prezidente PN, Maria Angelina Sarmento.

Nia akresenta katak maske tuir lei RAEOA nian prezidente RAEOA rasik nia iha lei espesiál ne´ebé maka regula nia maibé nian estatutu ne´e hanesan ho prezidente autoridade sira seluk, ne´ebé maka hanesan Ermera, Baucau Viqueque no Lautem. “Ba oin,  munisípiu haat ne´e sei hanaran órgaun autoridade  sein reseitas finanseiras i sira ne´e bele dehan goza autonomia finanseira hanesan mós ho RAEOA,”dehan primeiru vise prezidente parlamentu ne´e.

Tanba ne´e maka, tuir nia, proposta alterasaun la diminui prezidente repúblika nia kompeténsia no la aumenta prezidente repúblika nian kompeténsia tanba prezidente repúblika nia kompeténsia define klaru ona iha konstituisaun.

Hatan kona-ba partidu FRETILIN (Frente Revolucionário de Timor-Leste Independente) nia preokupasaun ne´ebé konsidera katak seidauk nesesáriu atu halo alterasaun ba lei kriasaun RAEOA- ZEEMS no laiha konsultasaun ba bankada oposizaun antes halo alterasaun, Primeiru Vise Prezidente Parlamentu, Maria Angelina Sarmento hateten, kualker inisiativa ba alterasaun lei nee prezidente parlamentu nasionál baixa ba komisaun relevante ba lei ne´ebé maka atu halo alterasaun. Entaun proposta lei ida ne´e baixa ba iha komisaun A.

“Ha´u hanoin katak bankada oposizaun sira nia representante iha komisaun A mós iha konsultasaun ne´e la´ós halo iha nivel bankada. Konsultasaun ne´e nivel komisaun ne´ebé iha reprezentante bankada oposizaun no bankada governu iha ne´ebá,” dehan nia.

Primeiru Vise Prezidente Parlamentu ne´e lamenta no triste tebes bankada oposizaun  ne´ebé halo “walk out” ka la´o sai  iha debate ne´e.Nia dehan kualker lamentasaun ne´ebé bankada oposizaun iha, plenaria buka solusaun.

“Mai ita debate, depois ita tetu razaun ne´ebé sira iha oinsa? maibé sira la marka presenza depois maka sira halo deklarasaun iha mídia  ne´e laduun justu. Sira bele razaun to´o iha ne´ebé mas  fatin atu diskute razaun sira ne´e no esplora ideia sira atu artigu sira relevante ka la relevante  ne´e fatin maka plenaria,” hateten Vise PPN, Angelina Sarmento.

Jornalista        : Natalino da Costa

Editór              : Rafy Belo