Top

Orsamentu Dezenvolve Kadoras iha Futuru Kestionável

Mapa fronteira tasi entre Timor-Leste no Austrália. Imajen espesiál

DILI, 3 agostu 2019 (TATOLI)—Sekretáriu Jerál Partidu FRETILIN, Marí Alkatiri, preokupadu osan atu dezenvolve kadoras iha futuru.

“Kadoras sei bele mai, maibé lori halo nusá. Kadoras atu mai, atu harii tan fábrika ba prosesamentu iha rai-laran, ita tenke gasta tan billiaun $16 to’o $18. Osan atu mai hosi ne’ebé?,” kestiona Alkatiri bainhira partisipa iha Konvíviu Populár ho militante FRETILIN, iha sede Komité Sentrál FRETILIN (CCF-sigla portugés), Comoro, sábadu ne’e.

Lee mós:
Rezultadu Polítika Negosiasaun Mak Tenke Fahe Reseita Kampu Greater Sunrise
FRETILIN Preokupa Fahe Reseita %30 iha Kampu Greater Sunrise ho Austrália
FRETILIN Kestiona Entidade Regulatória Ba Kampu Greater Sunrise
Aprovasaun Lei Haat Sei Hetan Benefísiu Hosi Ratifikasaun Tratadu Foun
Agio Diskorda Bankada FRETILIN Kona-ba Fahe Reseita iha Greater Sunrise

Nia haktuir, lori kadoras mai Timor-Leste (TL) povu hotu hakarak, bainhira manán ho matenek tuir direitu ne’ebé iha.

“Soberania la sosa. Soberania manán ho direitu, la’ós manán ho osan. Ita tenke iha kapasidade defende ita-nia direitu, la’ós manán ho tusan. Uluk ita kanta dehan direitu ba Kampu Greater Sunrise %100, derrepente ita fó tiha %30 ba Austrália. Tenke esplika klaru ida ne’e. Tanba ne’e mak FRETILIN vota kontra no la simu. Ita fa’an ita-nia soberania no ita peñor ita-nia soberania,” Alkatiri realsa.

Alkatiri preokupa mós katak nusá mak ema ida de’it halo desizaun ba estadu tomak, lakohi konsulta no lakohi rona ema seluk. “Depois dehan interese estadu maibé se mak estadu no saida mak estadu?,” nia lamenta.

Tanba ne’e, Alkatiri husu Negosiadór Prinsipál, Kay Rala Xanana Gusmão halo debate públiku. Alkatiri rekoñese Xanana mak lidera luta to’o referendu. “Ne’e ha’u rasik hasai xapeo. Ha’u la nega ema ida nia luta iha partisipasaun luta, maibé sira mak nega ha’u-nia partisipasaun,” nia subliña.

Jornalista: Evaristo Soares Martins

Editór: Xisto Freitas

Publisidade

Leave a Reply

Latest Post

error: Content is protected !!