Membru PN hosi Bankada FRETILIN, Antoninho Bianco.

DILI, 23 jullu 2019 (TATOLI)—Bankada FRETILIN iha Uma Fukun Parlamentu Nasionál, kestiona maka’as Entidade Regulatória ba prosesu dezenvolvimentu Greater Sunrise iha futuru.

Deputadu FRETILIN, Antoninho Bianco, kestiona maka’as asuntu ne’e tanba Austrália mós hola parte iha estrutura regulatória hodi hala’o regulamentasaun no administrasaun iha Rejime Espesiál ba Greater Sunrise, ne’ebé kompostu Autoridade Dezignada no Konsellu Supervizaun ne’ebé prevee iha artigu 5 aneksu B.

“Artigu 6 dehan, órgaun ida naran Autoridade Dezignada ne’e iha ema na’in-tolu—ita (Timor-Leste) iha rua no Austrália iha ida, maibé autoridade ne’e mós la halo votasaun ba planu dezenvolvimentu ne’ebé atu hala’o iha Greater Sunrise. Planu Greater Sunrise mós tenke hetan aseitasaun hosi Austrália. Signifika, sira ema ida maibé sira bele manda ita. Ne’e maka ita presiza kestiona. Ne’e soberania. Sira interven fali ita-nia soberania laran,” deputadu Antoninho Bianco kestiona hafoin aprovasaun ba rezolusaun hosi Governu kona-ba ratifikasaun ba Tratadu Fronteira Marítima, iha plenária Parlamentu Nasionál, tersa ne’e.

Iha artigu 6 aneksu B ne’e, Bianco esplika, Autoridade Dezignada sai responsável ba regulasaun no jestaun diária ba atividade petrolífera iha área Rejime Espesiál, ne’ebé reprezenta Timor-Leste no Austrália, reportandu ba Konsellu Supervizaun.

Deputadu FRETILIN ne’e afirma, ne’e hatudu katak Austrália mós iha kompeténsia foti desizaun ba prosesu dezenvolvimentu Greater Sunrise, maski kampu Greater Sunrise ne’e %100 Timor nian.

Nia mós kestiona artigu 7 aneksu B ne’ebé ko’alia kona-ba Konsellu Supervizaun. “Kompozisaun Konsellu Supervizaun ne’e ita iha rua no sira (Austrália) ida. Maski ita iha na’in-rua mós ita la manda, maibé Austrália nian manda iha laran. Se liga ba ita-nia asaun iha Greater Sunrise ne’e %56,56 no ita fó tan %30 mós sira interven nafatin,” nia afirma.

Purtantu, artigu 7 aneksu B ne’ebé ko’alia kona-ba Konsellu Supervizaun, alínea 1 hateten, Konsellu ne’e kompostu hosi ema na’in-rua nomeadu reprezenta Timor-Leste no ema ida nomeadu reprezenta Austrália. Reprezentante kada nasaun labele iha kualkér interese finanseira no interese komersiál diretu iha operasaun Rejime Espesiál ba Greater Sunrise.

Hosi artigu 7 alínea 2 (a), hateten ezerse ba Supervizaun Estratéjika kona-ba Rejime Espesiál iha Greater Sunrise nian. Alínea 2 (b), dehan kria no superviziona rejime ida garantia ho auditória ba verifikasaun reseita, regulasaun no administrasaun iha esplorasaun petróleu offshore (tasi).

Iha fatin hanesan, Deputadu FRETILIN, David Diaz Ximenes “Mandati”, haklaken Autoridade Dezignada ne’e iha papél boot tanba reprezenta nasaun rua hodi sai hanesan responsável ba atividade diária iha dezenvolvimentu Greater Sunrise.

“Autoridade ne’e atu haree tuir kontratante (empreza) nia planu dezenvolvimentu. Kuandu autoridade ho kontratante ne’e ladún intende malu, entaun lori ona ba Konsellu Supervizaun. Ne’e mós la’ós votasaun maibé konsensuál. Karik laiha entendimentu nafatin, entaun tama ona iha Komité Rezolusaun Lítiju. Ida ne’e labele mai tan Sekretáriu Jerál Tribunál Permanente Arbitrajen maibé buat sira konsensuál hotu,” levanta deputadu Mandati.

Tuir artigu 8 aneksu B ne’ebé ko’alia Komité Rezolusaun Lítiju, alínea 1 (a) esplika, komité ne’e hanesan órgaun independente hodi análize kualkér kestaun ne’ebé submete ba iha artigu 7 númeru 7 ka artigu 9 númeru 2 iha prezente aneksu B.

Hatán ba preokupasaun ne’e, Ministru Estadu Prezidénsia Konsellu Ministru, Hermenegildo Augusto Cabral Pereira, subliña Autoridade Dezignada mak Autoridade Nasionál Petróleu no Minerál (ANPM).

“Ha’u klarifika de’it katak ita ko’alia Autoridade Dezignada ne’e rua ita-nian, ida Austrália nian. Ita-nian maka ANPM. Ita ko’alia reseita 70:30 ne’e upstream,” Hermenegildo ‘Agio’ tenik.

Agio Pereira la esplika klaru kona-ba papél Konsellu Supervizaun no Komité Rezolusaun Lítiju nian ne’ebé bankada FRETILIN kestiona.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here