Deputadu Bankada FRETILIN, Joaquim dos Santos ‘Boraluli’. Imajen Tatoli/Egas Cristóvão

DILI, 22 jullu 2019 (TATOLI)—Bankada Opozisaun FRETILIN preokupa ho Proposta Rezolusaun Governu kona-ba Rejime Espesiál Greater Sunrise, ne’ebé artigu 2 iha rezolusaun ne’e ko’alia kona-ba propriedade petróleu no fahe reseita.

Deputadu Bankada FRETILIN, Joaquim dos Santos hateten preokupasaun liliu kona-ba proporsaun iha Kampu Greater Sunrise, katak se liña Fronteira Marítima definida ona tanbasá mak Timor-Leste tenke fahe proporsaun ka reseita ho Austrália iha Kampu Greater Sunrise.

“Ita lori ita-nia rikusoin sosa ita-nia fronteira, tanbasá mak Austrália mós sai na’in (Greater Sunrise). Se fronteira ne’e loos ona, rikusoin ne’e %100 ona maibé tanbasá mak Austrália sai na’in. Ida ne’e mak ha’u la kompriende,” Deputadu Joaquim ba jornalista sira iha resintu Parlamentu Nasionál (PN), segunda ne’e.

Nia dehan, esplikasaun foin lalais iha audisaun konjunta ho Negosiadór Prinsipál ba Delimitasaun Fronteira Marítima, Kay Rala Xanana Gusmão ho ninia ekipa ko’alia liu kona-ba konsiliasaun, maibé presiza mós esplikasaun kona-ba involvimentu Austrália iha kampu Greater Sunrise ne’e oinsá.

“Ami husu Negosiadór Prinsipál, maibé fila ba fila mai mak konsiliasaun. Ema hotu hatene konsiliasaun mak sai mediadór, maibé tanbasá mak liña ne’e la ba loos maibé fahe tiha Greater Sunrise ba rua. Ida ne’e Estadu Timor-Leste manán ka lakon,” nia kestiona.

Tuir deputadu ne’e, tanba saida mak tenke fahe porsaun ho Austrália, sé liña Fronteira Marítima definida ona.

“Ita-nia Negosiadór Prinsipál la esplika, ko’alia mak konsiliasaun. Konsiliasaun ne’e komisaun ida para instrumentaliza, maibé desizaun ne’e entre ita ho Austrália. Ha’u repete, se liña (Frontreira Marítima) ne’e %100 ita nian, tanbasá mak Austrália mós sai na’in %30? Ida ne’e mak problema,” katak deputadu ne’e ho preokupasaun-boot.

Hatán ba kestaun ne’e, Prezidente Parlamentu Nasionál (PPN), Arão Noé de Jesus da Costa Amaral hateten buat hotu-hotu Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão ho ninia ekipa esplika klaru ona maibé nafatin iha dúvida ne’e kestaun ida-idak nian.

“Ha’u la ko’alia polémika sira iha li’ur. Se sira (opozisaun) la intende ne’e buat seluk ona. Polítika ne’e  ida-idak nian. Ha’u fiar katak esforsu másimu halo tiha ona kona-ba asuntu ne’e. Dezde esplikasaun iha audiénsia públika, debate iha jeneralidade, debate iha espesialidade iha komisaun nian esklarese klaru iha ne’ebá. Se dúvida nafatin kestaun ida-idak ninian,” dehan PPN.

Entretantu, bazeia ba akordu Frontreira Marítima ne’ebé asina iha 6 marsu 2018, iha sede Organizaun Nasaun Unida (ONU), fó sai kedas prosesu dezenvolvimentu iha Kampu Greater Sunrise.

Tuir Proposta Rezolusaun nú. 2/V kona-ba ratifikasaun tratadu entre Timor-Leste ho Austrália, ne’ebé estabelese respetiva Fronteira Marítima iha Tasi Timor, iha anexu B kona-ba Rejime Espesiál ba Greater Sunrise, artigu 2 (Propriedade kona-ba petróleu no fahe reseita), alínea 2 hateten, parte rua sei fahe reseita esplorasaun Upstream petróleu iha kampu Greater Sunrise.

Artigu 2 alínea (a), hateten bainhira kadoras dada mai Timor-Leste, Austrália sei hetan 30% no Timor-Leste hetan 70%. Enkuantu, alínea (b) hosi artigu ne’e esplika, bainhira kadoras dada ba Austrália, Timor-Leste sei hetan %80 no Austrália hetan %20.

Timor-Leste sosa ona partisipasaun konsórsiu iha Kampu Greater Sunrise hosi kompañia petrolífera ConocoPhillips representa %30 ho montante orsamentu millaun $350, no hosi Shell reprezenta %26,6 ho montante orsamentu millaun $300.

Nune’e, partisipasaun Timor-Leste iha konsórsiu Greater Sunrise %56,6, Woodside (operadór) ho partisipasaun %33,4 no Osaka Gas %10.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here