Ekipa Tranzisaun lideradu hosi asesór prinsipál Ministériu Finansa, Helder Lopez, ho Sekretária Rejionál Asuntu Finansa RAEOA, Leonia Monteiro, realiza ona enkontru, kuarta (31/7). Imajen TATOLI/Cipriano Colo

OÉ-CUSSE, 31 jullu 2019 (TATOLI)—Iha kuarta (31/7), ekipa tranzisaun ne’ebé lidera hosi asesór prinsipál Ministériu Finansa, Helder Lopez, halo avaliasaun kona-ba área administrasaun finansa ne’ebé kompostu hosi pleneamentu, orsamentu, ezekusaun, reseita, patrimóniu móveis-imóveis, jurídiku,  inklui área temátika boot ida maka infraestrutura.

Hafoin enkontru iha edifísiu Rejiaun Administrativa Espesiál Oé-Cusse Ambeno (RAEOA) iha Oebau, RAEOA, ohin, Xefe Ekipa Tranzisaun, Helder Lopez hateten enkontru ne’e la’o di’ak teb-tebes, informasaun verbál balun ekipa hetan ona, dokumentu suporta balun mós autoridade fó ona, ne’ebé xefe ekipa rasik simu direta hosi eis Prezidente RAEOA, Marí Alkatiri kona-ba planu estratéjiku autoridade RAEOA nian ba tinan lima (2019-2023).

Helder esplika, ekipa iha kooperasaun di’ak ho autoridade no sei fornese mós dadus kona-ba projetu sira ne’ebé la’o hela, projetu ne’ebé kompleta ona, sira ne’ebé iha hela planu no sei fó lista detallu ba ekipa.

Lee mós:

Ekipa Tranzisaun To’o iha RAEOA

Hafoin Enkontru Introdutóriu, Aban Ekipa Tranzisaun Hala’o Serbisu

Laiha Koordenasaun, Alkatiri Konsidera Ekipa Tranzitóriu Hanesan Surpreza

Helder mós rekooñese kata durante diskusaun ne’e dinámiku tebes, tanba ne’e dalaruma mosu diskordánsia iha aspetu balun, maibé ikus mai, hotu-hotu kompriende no kolabora di’ak tebes.

Helder fó hanoin fali katak ekipa tranzisaun ninia mandatu espesífiku, tuir despaixu ne’ebé Primeiru-Ministru hatuun, atu halo avaliasaun ba pontu situasaun iha Rejiaun Administrativa Espesiál Oé-Cusse Ambeno (RAEOA) no Zona Ekonómika Espesiál Sosiál Merkadu  (ZEESM).

Ekipa ida ne’e iha loron sanulu atu kompleta nia mandatu no misaun, ne’ebé tuir planu sei hala’o avaliasaun durante loron lima iha RAEOA no loron lima prepara relatóriu iha Dili ho nia finalidade sei submete ba Primeiru-Ministru.

Atu hala’o kna’ar, ekipa ida ne’e serbisu hamutuk ho autoridade, hahú hosi nível leten to’o nível diresaun sira.

Xefe Ekipa Tranzisaun, Helder Lopez apresia  no agradese ba suporta hosi eis Prezidente RAEOA, Marí Alkatiri, ho nia disponibilidade no kooperasaun, hodi halo enkontru introdutoriu ho ekipa tranzisaun, no mós fó instrusaun klaru ba ninia Sekretáriu Rejionál sira atu serbisu hamutuk ho ekipa ida ne’e, hodi fornese informasaun, dadus tuir nesesidade no pedidu ne’ebé iha.

Helder subliña katak ekipa ne’e ninia mandatu atu tulun autoridade hodi komplementa informasaun nesesaáriu sira ne’ebé Governu Sentrál liliu Primeir-Ministru presiza, atu halo desizaun própiu kona-ba RAEOA-ZEESM.

Iha fatin hanesan, Sekretária Rejionál Asuntu Finansa RAEOA, Leonia da Costa Monteiro hateten bazeia ba pedidu hosi Xefe Ekipa ne’ebé husu atu kompleta relatóriu ida ba Primeiru-Ministru no parte finansa RAEOA aprezenta duni ezekusaun orsamentu jerál Estadu liuhusi relatóriu anuál 2015-2018 no mós ezekusaun primeiru no segundu trimestrál 2019.

Nia hatutan, relatóriu ne’e elabora no entrega ona ba Primeiru-Minisnitru, ho nia kópia sei entrega ba Ekipa Tranzisaun atu bele lori.

Leonia esplika liu-tan, tuir Lei númeru 3/2014 hateten katak autonomia finanseira, tanba ne’e maski seidauk iha sistema free balance, maibé autoridade halo jestaun ho kontabilidade excel hodi bele kontrola di’ak liu.

Kona-ba konta bankária, nia esplika, OJE ne’ebé oras ne’e iha konta bankária Banco Nacional Ultramarino (BNU), ekipa presiza atu hatene saldu ne’ebé sei hela iha RAEOA.

Ho pedidu ne’e, parte finansa RAEOA fó hotu dadus, tanba iha konsiliasaun bankária, parte finansa sempre halo lor-loron, nune’e konsege fó dadus to’o loron 30 jullu 2019.

Liga ho parte infraestrutura, parte Sekretaria Rejionál Asuntu Finansa mós aprezenta ba ekipa katak ida ne’ebé sei halo hela maka estrada ne’ebé iha hela prosesu aprovizionamentu, maka hanesan estrada ba Citrana no Oesilo.

Tuir planu, kinta (01/8), ekipa sei hala’o enkontru ho Sekretáriu Rejiaun asuntu Edukasaun, Sosiál, Saúde, Agrikultura no Terra no Propriedade.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here