Xefe Ekipa Tranzisaun, Helder Lopez

DILI, 30 jullu 2019 (TATOLI)—Ekipa tranzisaun ne’ebé lidera hosi atuál asesór Ministériu Finansa (MF), hala’o ona enkontru introdutóriu ho Prezidente Autoridade Rejiaun Administrativa Espesiál Oé-Cusse Ambeno (RAEOA), Marí Alkatiri, iha Gabinete Autoridade Oebau, tersa lorokraik ne’e.

Hafoin enkontru, Xefe Ekipa Tranzisaun, Helder Lopez, hateten enkontru ne’e di’ak teb-tebes, tanba Prezidente Autoridade autoriza ona Sekretáriu Rejionál sira atu aban (31/7) bele hahú ona enkontru ho ekipa ne’e, hodi diskute kona-ba pontu situasaun ne’ebé iha.

Lee mós:

Ekipa Tranzisaun To’o iha RAEOA

Aleinde ne’e, bainhira hetan ona informasaun sufisiente, ekipa ne’e sei tún ba Dili hodi prepara relatóriu atu submete ba Primeiru-Ministru.

Nia dehan, Prezidente Autoridade mós konfirmadu katak disponível atu hasoru ekipa ne’e iha Dili, bainhira hakarak atu konfirma asuntu balun ne’ebé sei ko’alia iha nível tékniku ho sekretáriu rejionál sira.

Tanba ne’e, nia haktuir, enkontru ne’e produtivu tebes, iha ámbitu ida ne’ebé hotu-hotu mai ho hanoin atu kontinua hadi’a Oé-Cusse sai di’ak liu-tan.

Helder agradese ba Prezidente RAEOA, Marí Alkatiri no espera katak, enkontru aban, bainrua to’o loron lima ne’e ramata, bele prepara di’ak liu-tan relatóriu ba Primeiru-Ministru, sei la’o ho di’ak tuir mandatu ne’ebé fó.

Tuir ajenda, aban, ekipa tranzitóriu ho sekretáriu rejionál sira sei ko’alia uluk kona-ba área temátika finansa nian liu-liu kona ba ezekusaun orsamentu, jestaun finansa públika, inklui sistema ne’ebé utiliza, patrimóniu móvel no imoveis, investimentu públiku liliu projetu infraestrutura ne’ebé la’o hela iha Oé-Cusse, balun kompleta ona, balun la’o hela, balun iha planu atu kompleta.

Buat prinsipal ne’ebé iha maka atu bele hetan informasaun nune’e bele relata ba Primeiru Ministru. Iha loron tuir mai, sei tama ba área sira seluk.

Nune’e mós, Prezidente Autoridade RAEOA, Marí Alkatiri, hateten durante enkontru nia hato’o ona ba Helder Lopez katak, aban nia sei fila ona ba Dili no iha esperansa katak Sekretáriu Rejionál sira sei iha kooperasaun di’ak ho ekipa refere.

Prezidente Autoridade hatutan, mandatu sei to’o meia noite no sei iha tempu atu bele fó orientasaun ba Sekretáriu Rejionál sira.

Jornalista: Cipriano Colo

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here