Prezidente Autoridade RAEOA, Marí Alkatiri. Imajen Tatoli/António Gonçalves

DILI, 30  jullu 2019 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), Marí Alkatiri, konsidera vizita hosi Ekipa Tranzisaun governu hanesan surpreza tanba mai derrepente no laiha koordenasaun.

Nia hateten, durante ne’e, relasaun institusionál entre Autoridade RAEOA ho Governu Sentrál liliu Primeiru-Ministru, Taur Matan Ruak di’ak tebes, maibé vizita ida ne’e mak sai hanesan surpreza boot.

Lee mós:

Hafoin Enkontru Introdutóriu, Aban Ekipa Tranzisaun Hala’o Serbisu

Ekipa Tranzisaun To’o iha RAEOA

“Vizita ida ne’e mak halo ha’u hetan surpreza boot tanba laiha informasaun hosi Governu Sentrál, hafoin enkontru mak ha’u foin simu karta ne’ebé mai hosi Primeiru-Ministru,” hateten Alkatiri hafoin enkontru introdutóriu ho Ekipa Tranzitóriu, iha Gabinete Autoridade iha Oebau, ohin.

Alkatiri konsidera kestaun ne’e la normál iha relasionamentu institusionál ida ne’ebé di’ak durante tinan ida resin, derrepente iha mandatu nia rohan buat ne’e falla tiha.

Maski nune’e, Alkatiri hateten ba Xefe Ekipa Tranzitóriu, Helder Lopez katak sei koopera nafatin liuhosi Prezidente Autoridade interinu ho kooperasaun tomak atu bele fasilita prosesu serbisu ne’ebé ekipa ne’e sei hala’o tuir despaixu ne’ebé iha.

Kona-ba asuntu ne’e, Helder Lopez informa, ekipa ne’e bele fó de’it komentáriu tuir mandatu ne’ebé Governu fó, maibé kona-ba koordenasaun entre Governu ho Autoridade, la’ós ekipa nia kompeténsia atu ko’alia.

Helder hatutan, ho situasuan sira ne’ebé iha, kooperasaun ne’ebé iha, liliu iha inísiu enkontru la’o di’ak tebes, tanba ne’e iha esperansa katak serbisu  ne’e rezulta buat ne’ebé sira hotu hein.

Jornalista: Cipriano Colo

Editór: Xisto Freitas

1 KOMENTÁRIU

  1. Hau pesoal senti orgulho ho prejensa ajensia Tatoli nian, dader molok hahu hau nia servisu hau sempre le’e uluk notisiais sira nebe Tatoli publika.
    hau espera katak iha futuru Tatoli bele ativu liu tan hodi partilha informasaun sira husi munisipiu, postu administrativu no suco sira, tamba informasaun hirak nee persija tebe-tebes atu publika hodi ema hotu bele akompania dezenvelvimentu no progresu sira nebe iha base. husu ba ajensia Tatoli sebele tau ketak mos informasaun sira husi ita nia orgaun soberania hat (4) nomos institiusaun independete rua PNTL – F-FDTL. no iha sorin seluk sebele tau ketak tiha notisiais sira nebe ita konsidera hanesan:
    1. Other news
    2. Latest News
    3. Hot News
    4. Local activities
    5. Timor-Leste & World

    Obrigado

HAKEREK NO HATÁN

Please enter your comment!
Please enter your name here