Ekipa tranzisaun lideradu hosi atuál asesór Ministériu Finansa (MF), Helder Lopez, to’o iha Oé-Cusse. Imajen Tatoli/Cipriano Colo

OÉ-CUSSE, 30  jullu 2019 (TATOLI)—Ekipa tranzisaun ne’ebé lidera hosi atuál asesór Ministériu Finansa (MF), Helder Lopez, to’o ona iha Oé-Cusse ho aviaun ZEESM, tersa (30/7) tuku 12:30 otl.

Hafoin tún hosi aviaun, iha Aeroportu Internasional Rota do Sândalo Palaban, Helder Lopez, ba TATOLI hateten ekipa ne’e atu serbisu ho Autoridade Rejiaun Administrativa Espesiál Oé-Cusse Ambeno (RAEOA), halo avaliasaun ba situasaun ne’ebé akontese liga ho dezenvolvimentu ne’ebé akontese iha RAEOA.

Nia esplika, avaliasaun ne’e sei haree liu-ba área finansa, administrasaun, ne’ebé iha ninia sub komponente hanesan infraestrutura, orsamentu, patrimóniu no mós área administrasaun kobertura ba setór hotu-hotu.

Nia dehan haree situasaun sira ne’e, nune’e informasaun ida ne’e bele komplementa tan informasaun ne’ebé autoridade prepara daudaun, kona-ba relatóriu atu entrega ba Primeiru-Ministru.

Nune’e, komplementa sira-nia relatóriu ba Primeiru-Minnistru, bazeia ba informasaun sira ne’e maka Primeiru-Ministru bele halo desizaun atu nomea Prezidente Autoridade foun.

Aleinde ne’e, Helder saliente informasaun ne’e bele pasa ba Prezidente Autoridade foun hodi utiliza, nune’e bainhira Prezidente Autoridade foun mai, hala’o kna’ar karik bele utiliza informasaun hirak ne’e.

Ekipa ne’e mai hosi Ministériu Finansa lidera hosi atuál asesór Helder Lopez, ema na’in rua hosi Ministériu Administrasaun Estatal (MAE), na’in ida mai hosi Komisaun Funsaun Públika (KFP), na’in ida mai hosi Ministériu Obra Públika (MOP), na’in rua hosi Ministériu Planeamentu Investimentu Estratéjiku (MPIE), na’in ida hosi Ajénsia Dezenvolvimentu Nasionál (ADN), na’in ida hosi asesoria legál Ministériu Planeamentu Investimentu Estratéjiku (MPIE).

Tuir planu, ekipa ne’e sei hamutuk ho autoridade durante semana ida. Iha tuku 3 loraik ne’e, ekipa sei halo introdusaun bazeia ba despaixu.

Despaixu ne’e hatún hosi Primeiru-Ministru (PM), Taur Matan Ruak, hodi harii ekipa tranzisaun ida ne’ebé hanaran Ekipa Traballu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here