Prezidente Ezekutivu Ajénsia Notisioza Tatoli, José da Costa, ohin asina termu pose, akompaña hosi Sekretáriu Estadu Komunikasaun Sosiál (SEKOMS), Mericio Juvenal dos Reis Akara, ho periúdu tinan haat, iha Palásiu Governu. Imajen António Goncalves

DILI, (TATOLI) – Governu liuhusi Sekretáriu Estadu Komunikasaun Sosiál (SEKOMS), Merício Juvenal dos Reis Akara, fó pose ba José da Costa, eis-adjuntu World Vision, hodi sai Prezidente Ezekutivu ba ajénsia notiziosa TATOLI, IP (Institutu Públiku), durante mandatu tinan haat, hahú 2018 to’o 2022.

Prezidente TATOLI, IP, José da Costa, iha nia diskursu kompromete sei tau interese Estadu aas liu duke interese pesoál.

Nune’e mós konseidera tomada posse ba nia nu’udar parte importante ida ba dezenvolvimentu TATOLI, IP, nian no sei kontinua ho esforsu sira seluk tuir mai hodi hatuur fundasaun ida hodi hala’o servisu ida rigór no profisionál.

“Iha buat rua ne’ebé sei orienta ha’u-nia hanoin tomak ba oin, iha ha’u-na mandatu. Ida uluk mak dezenvolvimentu institusionál. Ida seluk mak kualidade, kredibilidade ba informasaun”, kompromete depois halo juramentu pose iha Palásiu Governu, ohin lorokra’ik ne’e.

Nia akresenta instituisaun ida atu la’o ho di’ak no dezenvolve ho lalais, depende ba ema nu’udar rekursu prinsipál iha instituisaun nia laran. Alende rekursu seluk hanesan finanseiru, planeamentu no ezekusaun ida rigor, lei no regulamentu ne’ebé kontestualizadu no parseria ida forte ho entidade hotu no parte interesadu sira.

“Nune’e mós ba kualidade no integridade informasaun depende rekursu, abilidade nomós teknolojia atu halo kobertura no publikasaun”, katak tan.

Prezidente ne’e mós akresenta tan TATOLI, IP, nu’udar instituisaun públiku sei depende ba rekursu finanseiru Estadu nian no rekoñese katak sei iha buat barak nu’udar prioridade atu hatan ho lalais no urjente, maibé ho esforsu no apoiu entidade tomak nian, atu halo posibilidade hothotu atu realiza hanoin ne’ebé estadu iha ba ajénsia TATOLI, IP.

“Hirak ne’e hotu nu’udar dezafiu, ami tenta ultrapasa ho neneik to’o tempu duni. Ne’ebé, ami komprometidu duni atu serbisu iha ekipa, serbisu profesionál, dedikasaun aas no sempre fiar ba mudansa sira ne’ebé sei mai iha tempu oin mai”, garante Ezekutivu TATOLI ne’e.

“Ha’u konfiansa tomak ba ekipa sira ne’ebé serbisu iha TATOLI. Ha’u sura ho kolega jornalista sira hotu, husi mídia oioin, ne’ebé iha Timor-Leste, ofisiál iha mídia Estadu no governu nian sira. Kolega sira ne’ebé ho individualmente apresia aan iha mídia internasionál sira no liliu ba públiku nia tulun, liuhusi krítika no sujestaun atu lori TATOLI ba oin ho di’ak”, nia reforsa tan.

Prezidente TATOLI, IP, José da Costa, mós agradese ba públiku tomak, belun no kolega sira hotu ne’ebé hato’o ona sira-nia felisitasaun. Nune’e mós ba ema sira ne’ebé mak dúvida ho nia nomeisaun.

“Sira hotu mak ha’u sei konta nu’udar belun di’ak sira, ne’ebé sei akompaña no hakat hamutuk ho ha’u lorloron, no hamutuk ho ami iha TATOLI durante períodu ne’e tomak”, dehan ezekutivu ne’e.

Iha biban ne’e, nia mós agredese ba Sekretáriu Estadu nomós membru governu tomak, ba konfiansa ne’ebé fó ba nia hodi asume kna’ar ne’e.

“Ha’u-nia agradesimentu kle’an no kontinua sura ho apoiu ne’ebé ha’u sei hetan iha ha’u-nia mandatu tomak. Ba TATOLI, ho TATOLI, ita sei akompaña progresu ba dezenvolvimentu nasionál ho atuál no fatuál”, garante.

Iha fatin hanesan, SEKOMS, Merício Akara, hatete desizaun atu nomea Prezidente TATOLI, IP, la’ós fásil maibé liuhusi prosesu naruk no ho dinámiku oioin.

“Maibé ho Sekretáriu Komunikasaun Sosiál hakarak simu konsekuénsia saida de’it hodi propoen prezidente foun hodi aprova iha Konsellu-Ministru. Ida ne’e mak prosesu dinámiku ne’ebé mak ita enfrenta”, haktuir.

Sekretáriu Estadu katak tempu agora atu serbisu, tempu atu prezidente TATOLI espresa no artikula kapasidade tomak. Nune’e mós husu ba orgaun tomak ne’ebé tutela ba SEKOMS atu kolabora no apoiu Prezidente José da Costa, ne’ebé sei lidera TATOLI, IP, mídia Estadu ne’e.

“Prosesu hotu ne’ebé mak la’o to’o desizaun ida ne’e, ita orgullu tanba ita-nia Primeiru-Ministru informadu, akompaña, até ohin tomada de posse. Hahú ohin ba oin, ita-boot (prezidente TATOLI, IP-red) atu hala’o funsaun di’ak liu. Parabéns ba ita-boot”, kongratula Akara.

Nomeisaun ne’e liuhosi desizaun Konsellu-Ministru nian ho rezolusaun governu iha kuarta, (5/12/2018), hodi substitui Prezidente TATOLI indijitadu anteriór, Rosário da Graça Maia, ne’ebé indijita liuhusi dezisaun Konsellu-Ministru iha tersa, (11/7/2017), ho rezolusaun governu nian mós.

Antes ne’e, bainhira seidauk indijita Prezidente TATOLI, IP, atuál José da Costa, SEKOMS, Merício Akara,  iha biban enkontru ho prezidente ezekutivu indijitadu sesante, Rosário da Graça Maia, ba jornalista sira informa durante enkontru iha pontu importante rua mak ko’alia; primeiru kona-ba planu ba toma pose prezidente indijitadu no segundu husu prezidente nia hanoin, vizaun, oinsá dezenvolve TATOLI, IP ne’e ba futuru.

Prezidente Ezekutivu Ajénsia Notisiáriu Tatoli, Rosario Maia Martins, sorumutu ho Sekretáriu Estadu Komunikasaun Sosiál, Merício Juvenal dos Reis Akara, iha Palásiu Governu, sesta (5/10). Imajen Egas Cristovão

Rosário da Graça Maia nomeia husi Konsellu-ministru, tersa (11/7) iha 2017, liuhusi rezolusaun governu ne’ebé aprezenta husi SEKOMS iha sestu governu konstitusionál tanba konsidera no rekoñese mós kapasidade téknika, jestaun, esperiénsia, senioridade no imparsialidade.

 Notísia no video relevante sira; http://www.tatoli.tl/2018/12/jose-da-costa-nomeiadu-ba-prezidente-tatoliip/

http://www.tatoli.tl/2017/07/km-nomeia-rosario-maia-lidera-agensia-tatoli/

https://www.youtube.com/watch?v=-BNwtZxvKNI&feature=youtu.be

http://www.tatoli.tl/2017/07/lidera-tatoli-onra-boot-ba-rosario/

 Ekipa Kobertura

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here