Lidera TATOLI ‘Onra’ Boot Ba Rosário

0
164
Prezidente Konsellu Diretivu TATOLI-Agência Noticiosa Timor-Leste I.P, Rosario da Graça Maia

DILI (TATOLI)— Rosário da Graça Maia sente onradu ho nomeasaun VI governu konstitusionalidade ba fi’ar ne’ebé mak artibui ba nia aan hodi asume kargu nu’udar Prezidenti Konsellu Diretivu TATOLI-Ajénsia Notisioza Timor-Leste, I.P, durante tinan haat (2018-2021).

“Ha’u sente onradu ho nomeiasaun Governu,” Rosário Maia fó sai nia sentimentu hafoin Governu liuhusi reuniaun  konsellu ministru, Tersa (11/07) aprova rezolusaun Governu ne’ebé aprezenta husi Ministru Estadu Presidénsia Konsellu Ministru, Agio Pereira iha Palásiu Governu, hodi nomea nia ba kargu lideransa TATOLI.

Nu’udar lideransa masimu ba Ajénsia TATOLI Rosário sei difine uluk planu estratéjiku ajénsia TATOLI nian, no mós difine polítika ba preparasaun rekursu úmanus no elabora regulamentu internu hodi sai matadalan ba lala’ok servisu ajénsia nian hodi fó infomasaun ba públiku.

Entertantu Ajénsia TATOLI sai hanesan fontes ofisial informasaun ne’ebé nain hosi Ajénsia ne’e mak estadu Timor-Leste. Hanesan mós ajénsia Notisioza sira seluk iha mundu, TATOLI mai ho papel ida atu halo kobertura no fahe informasaun inportante ho lalais, akuradu, ba teritoriu Timor-Leste no mós mundu.

TATOLI eziste bazeia ba desijaun konsellu ministru, loron 3 fulan Febreiru, tinan 2016, ne’ebé konsagra iha akta No 9/2016, ho pajina Jornal Repúblika, loron 16, Marsu, 2016.

Istrumentu atu alkansa vizaun no misaun TATOLI nian, mak TATOLI sei sai hanesan fontes uniku ba informasaun nasionál ho kredibilidade, koalidade ba benefisiu sidadaun Timor-Leste.

Ajénsia TATOLI  hato’o informasaun ho karakter multimídia, multiplataforma, no mós multicanal iha telefone andriod no IOS, inklui mídia online ne’ebé notisia eskrita, radio no televisaun ho previzaun ida sei halo atendimentu durante oras rua nulu resin hat ho notisia aktual, ne’ebé sei oferese ho lia tolu, tetum, Inglés, no Portugués.

Profesionais Jornalista ne’ebé oras ne’e servisu iha Ajénsia TATOLI iha ema nain hitu no hetan tulun hosi funsionariu Sekretáriu Estadu Komunikasaun Sosial (SEKOMS) dirasaun desiminasaun informasaun.

Antes ne’e mós Sekretáriu Estadu Komunikasaun Sosial, Nélio Isaac Sarmento hato’o nia espetativa katak, Ajénsia TATOLI ba futuru bele sai fontes informasaun  kredivel ba komunidade nasionál tantu internasionál.

“Espera mós bele sai hanesan inspirador ba profisaun jornalista moderno ho estandarte profesionál,” Nélio Isaac afirma.

(Jornalista:Agapito dos Santos, Editór : Manuel Pinto)

HUSIK IDA HATÁN