José da Costa Nomeiadu Ba Prezidente TATOLI,IP

1
159
José da Costa, atuál World Vision-nia Adjuntu, hanesan Prezidente Konsellu Diretivu Ajénsia Notisioza Timor-Leste Tatoli, Institutu Públiku (IP) durante tinan haat. Imajen ne'e foti hosi Fanpage World Vision TL

DILI, (TATOLI) – Governu liuhosi reuniaun Konsellu Ministru, ohin nomea José da Costa, atuál World Vision-nia Adjuntu, hanesan Prezidente Konsellu Diretivu Ajénsia Notisioza Timor-Leste TATOLI, Institutu Públiku (IP) durante tinan haat.

TATOLI mosu ho embriaun iha Sekretariu Estadu Komunikasaun Sosiál (SEKOMS) nia okos durante tinan rua ona maibé seidauk iha estrutura proprío hodi ezekuta orsamentu ne’ebé governu aloka iha tinan 2018 ho montante rihun $30.

“Ohin aprejenta iha Konsellu Ministru no aprova ona Prezidente Tatoli, tanba ne’e ita hein bainhira públika iha Jornál Repúblika, ita sei buka tempu hodi fó pose”, hateten Sekretáriu Estadu Komunikasaun Sosiál, Merício Juvenal dos Reis Akara, iha Palásiu Governu, ohin.

Ho desizaun governu ne’e sei ajuda atu  jere instituisaun públiku, intermu rekursu umanu, finanseira no seluk tan ho kualidade.

“Ita sei hili tan vise prezidente rua ne’ebé ida kona-ba kontiudo programa no ida seluk kona-ba jestaun administrasaun, finansa para apoiu prezidente”, katak tan.

Tuir nia prezidente nomeadu iha esperénsia iha ajénsia internasionál world vision durante tinan 11, tanba ne’e iha kapasidade hodi lidera TATOLI.

Governu sei kontinua fó prioridade, dezenvolve TATOLI sai hanesan Antara (Indonézia) no Lusa (Portugal).

Entretantu, ohin Governu mós aprova proposta ba nomeasaun Armindo Maia hanesan Prezidente  Konsellu Jerál Institutu Politékniku Betano ba mandatu tinan tolu. Proposta ne’e aprejenta hosi Ministru Ensinu Superiór Siénsia no Kultura, Longuinhos dos Santos.

Alende ne’e aprova mós rezolusaun governu ne’ebé aprejenta hosi Ministériu Transporte no Komunikasaun hodi nomea Gabriel de Jesus hanesan Diretór Naun Ezekutivu Autoridade Nasionál Komunikasaun.

Jornalista: Agapito dos Santos

Editora: Rita Almeida

1 COMMENT

HUSIK IDA HATÁN