DILI, 28 juñu 2022 (TATOLI)— Traballadora Timoroan na’in-hitu iha Dubai, Uni Emiradu Árabe, hahú hetan presaun makas hosi empreza ne’ebé fó-serbisu, nune’e traballadora hirak ne’e hakarak fila ona mai Timor-Leste.
“Ami agora sira (empreza na’in) halo terus liután. Daudaun ne’e, sira ameasa ami no sulan ami ona iha fatin kloot. Kolega na’in-neen seluk nia telefone sira (empreza na’in) hadau hotu ona,” Timoroan ho inisial ECdR, informa ba Agência TATOLI via WhatsApp, kuarta ne’e.
Notísia relevante: Timoroan na’in-hitu “terus” hela iha Dubai
Traballadora ne’e hatutan bainhira sulan sira empereza na’in la fó hahán, maibé kolega sira ne’ebé serbisu kle’ur iha ne’e mak lori hahán mai.
“Agora sira sulan ona ami, fó batas loron tolu ami tenke sosa rasik tikete hodi fila, se la sosa mak nia (empreza na’in) ne’e duni sai ami ,” nia afirma.
Pior liután, nia dehan empreza na’in mai ko’alia ho trabaladora sira atu hakarak halo video karik ho oin hamnasa no dehan ba família sira katak, daudaun ne’e hasoru situasaun di’ak hela.
“Ha’u serbisu iha empreza salon (…..) no kolega seluk serbisu iha fatin la hanesan. Ami hotu hetan presaun maka’as liután. Nune’e ami hakarak fila ona, ami lakohi terus tan iha ne’e,” ECdR hatutan.
Notísia relevante: PCIC detein sidadaun estranjeiru na’in-rua ba kazu tráfiku
Hafoin Governu Timor-Leste halo kooperasaun ho INTERPOL Dubai nian hodi halibur evidénsia no detein sidadaun estranjeiru na’in-rua ne’ebé trata no fasilita dokumentu ilegál ba Timoroan na’in-hitu mesak feto, ho inisiál BS, ECdR, L, P, M, A, A. Empreza ne’ebé fó-serbisu hahú ameasa no fó presaun hodi sulan sira iha uma-laran de’it no la fó hahán.
“Empreza na’in halo presaun no ameasa-ami tanba Polísia Sientífiku Investigasaun Kriminál (PCIC-sigla Portugés), halo detensaun ba autór prinsipál, ne’ebé fasilita ami mai ne’e,” nia konta.
Durante servisu iha Dubai, traballadora nain-hitu ne’e laiha kontratu, maibé serbisu ho baze ba surat-tahan mutin. Surat-tahan mutin ne’e sira-rekolla to’o 5.000, empreza na’in-selu traballadór hirak ne’e ho 200 dirham (ekivale 54,45 dolár Amerikanu) de’it. Se surat ne’e la to’o, empreza na’in la selu.
Traballadora timoroan na’in-hitu ne’e arranka bá Dubai iha loron 19 juñu ho visa turista.
Notísia relevante: PCIC detein suspeitu nain-tolu ba kazu tráfiku umanu
Jornalista: Hortencio Sanchez
Editór : Florencio Miranda Ximenes