PCIC ezekuta mandadu hosi tribunál hodi halo buska domisiliáriu, detensaun no apareesaun ba timoroan na’in-tolu tanba deskonfia envolve iha kazu krime tráfiku umanu no krime organizadu. Imajen/Natalino Costa.

DILI, 22 juñu 2022 (TATOLI)—Polísia Siéntifika Investigasaun Kriminál (PCIC, sigla portugés), kuarta ne’e, ezekuta mandadu hosi tribunál hodi halo buska domisiliária, detensaun no apreensaun ba timoroan na’in-tolu, suspeitu ba  kazu tráfiku umanu no krime organizadu, ne’ebé fasilita dokumentu ba joven-feto sira bá servisu iha diáspora.

Suspeitu sira ho inisiál MVT, HS no JG hetan detensaun hosi PCIC bazea ba karta mandadu hosi Tribunál  Disritál Dili (TDD) ho númeru Nuc 0248/22/PCIC.

Orden buska no detensaun konsede iha aktu inkéritu nian ne’ebé atu investiga suspeitu sira tuir kódigu penál artigu 163, iha númeru 1, aliñea d to’o e.

PCIC halo detensaun ba suspeitu sira iha fatin no oras la hanesan. MVT ekipa PCIC detein iha área Benfica nia-oin iha iha tuku 12:30, suspeitu HdS detein iha área Kampung Baru-Comoro, iha tuku 13:00 no JG detein iha nia rezidénsia área Faularan, suku Benonuk, postu administrativu Dom-Aleixo iha tuku 13:04.

“Prosesu detensaun ne’e ita halo bazea ba keiza hosi família vítima sira mai iha PCIC, no ami remete auto notísia ba Ministériu Públiku hodi solisita bá tribunál para halo mandadu detensaun hasoru suspeitu nain-tolu ne’e”, Adjuntu Diretór PCIC, Adin Nunes Cabral, hateten liuhosi konferénsia Imprensa iha PCIC-Caicoli, kuarta ne’e.

Nia hatutan, suspeitu nain tolu ne’e iha rede ho ajénsia balun hosi Indonézia hodi fasilita no trata dokumentu timor-oan sira, liuliu feto atu bá serbisu iha Malázia no Dubai.

PCIC mós koopera ona ho INTERPOL liuhosi Polísia Indonézia (MABES POLRI) hodi identifika ajénsia Indonézia nia-fatin no atividade sira.

“Ita nia vitima nain-hitu mesak feto, agora iha Dubai no nain tolu agora daudaun iha Malázia. Ami sei kontinua buka tuir ajénsia sira ne’ebé rekruta timor-oan la ho dalan legál hodi prosesa sira”, nia kompromete.

Hafoin halo detensaun, ekipa PCIC mós halo apreensaun ba matéria evidénsia sira iha suspeitu sira-nian rezidénsia no eskritóriu ajénsia hanesan komputadór no dokumentu ne’ebé durante ne’e suspeitu sira uza hodi fasilita.

Suspeitu sira agora daudaun iha sala detensaun PCIC, durante oras 72 nia laran, hafoin submete ba prosesu primeiru interrogatóriu iha Tribunál Distritál Dili (TDD).

Notísia relevante: Timoroan na’in-hitu “terus” hela iha Dubai 

Journalista  : Natalino Costa

Editór            : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here