Konstrusaun Uma Kbiit Laek ba povu kbiit laek sira. Imajen/Mídia MAE.

COVALIMA, 13 juñu 2022 (TATOLI)–Governu liuhosi Programa Nasionál Dezenvolvimentu Suku (PNDS), entrega ona konstrusaun projetu Uma Kbiit Laek (UKL) faze dahuluk tinan fiskál 2021 hamutuk unidade 39 ba benefisiáriu ka ema kbiit laek sira iha Covalima.

Notísia Relevante: Ekipa PNDS verifika ona benefisiáriu Uma Kbiit Laek 154 iha Covalima

“Progresu implementasuan UKL faze dahuluk ne’ebé uza Orsamentu Jerál Estadu (OJE) 2021 hamutuk unidade 90, no hosi númeru ne’e ita konklui ona konstrusaun ne’ebé atinje ona 100% no entrega ona unidade 39 ba benefisiáriu sira iha Covalima,” Diretór Programa Nasionál Dezenvolvimentu Suku (PNDS) Covalima, Filipe Cardoso, informa ba Agência Tatoli, iha nia knar fatin, Kampung Baru, segunda ne’e.

Ekipa PNDS entrega Uma Kbiit Laek (UKL) ba benefisiáriu 39 ne’e kompostu hosi benefisiáriu sira iha postu administrativu hitu, suku 13 no aldeia 13 iha munisípiu Covalima.

Iha postu administrativu Fatululik, Governu entrega ona Uma Kbiit Laek (UKL) ba benefisiáriu sira iha suku Taroman ne’e iha aldeia Makous, iha suku Fafululik iha aldeia Beidasi.

Iha postu administrative Fohorem, Governu entrega ona Uma Kbiit Laek ba ema kbiit laek iha suku Datolu ne’e iha aldeia Natardik.

Iha postu administrativu Maucatar, Governu entrega Uma Kbiit Laek ba benefisiáriu sira iha suku Belekasac iha aldeia Busa-dao, Holpilat iha aldeia Fatuk Oan, Ogues iha aldeia Orun no postu administrativu Tilomar ne’e Governu entrega una UKL ba benefisiáriu iha suku Lalawa, aldeia Ai-oan.

Iha postu administrativu Zumalai, Governu entrega ona Uma Kbiit Laek ba ema kbiit laek sira iha suku Fatuleto iha aldeia Nalaop, suku Lour iha aldeia Laegatal, suku Mape iha aldeia Polo, suku Raimea iha aldeia Beilaco, suku Tashilin iha aldeia Hasana no suku Zulo iha aldeia Lale.

Ekipa PNDS entrega UKL unidade 39 ho medida konstrusaun tipu la hanesan tanba konstrusaun Uma Kbiit Laek (UKL) balun iha metru 48 kuadradu no balun metru 37 kuadradu.

Iha tinan fiskál 2021, ekipa Programa Nasionál Dezenvolvimentu Suku (PNDS) konstrui Uma Kbiit Laek (UKL) 90 ne’ebé konstrui iha postu administrativu hitu iha suku 30, no hosi númeru ne’e suku 13 konstrui UKL 100% ona no suku sira seluk sei kontinua nafatin halo konstrusaun.

“Maske PNDS entrega ona UKL unidade 39 maibé restu konsidera nafatin iha planu asaun kontinua kompleta konstrusaun. Ami iha ona planu mensál, fulan-juñu to’o agostu atu finaliza obra konstrusaun UKL ba faze dahuluk ne’ebe ho unidade 90,” nia dehan.

Ekipa Programa Nasionál Dezenvolvimentu Suku (PNDS) konstrui Uma Kbiit Laek (UKL) unidade 90 ne’e ho orsamentu hamutuk $1,491,000.00.

Notísia Relevante: Konstrusaun Uma Kbiit Laek 90 iha Covalima atinje ona 75,54%

Tinan 2022: PNDS sei konstrui “Uma Kbiit Laek” 278 iha Covalima

 Jornalista : Celestina Teles                               

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here