Diretor PNDS Covalima, Filipe Cardoso. Imajen Tatoli/Celestina Teles.

COVALIMA, 31 maiu 2022 (TATOLI)–Diretór Programa Nasionál Dezenvolvimentu Suku (PNDS) munisípiu Covalima, Filipe Cardoso, informa ekipa PNDS foin mak verifika benefisiáriu Uma Kbiit Laek (UKL) hamutuk uma-kain 154 hosi konstrusaun uma 278 iha Covalima.

Notísia Relevante: Tinan 2022: PNDS sei konstrui “Uma Kbiit Laek” 278 iha Covalima

Nia hateten, dadus provizóriu ne’e halibur hafoin ekipa PNDS halo verifikasaun ba benefisiáriu iha terrenu no falta uma-kain 30 mak sei halo prosesu reverifikasaun.

“Provizoriu ita konklui ona verifikasaun ba benefisiáriu ne’ebé elizivel hamutuk uma-kain 1154, ne’ebé sai benefisiáriu implementasaun UKL faze daruak tinan fiskal 2022,” Filipe Cardoso informa ba Agência Tatoli, iha nia knar fatin Kampung Baru, tersa ne’e.

Hafoin identifika benefisiáriu elizivel, nu’udar manan-na’in tekniku postu PNDS halo ona levantamentu tekniku ba kada benefisiáriu nia fatin, hodi haree ona medida rai no uma hodi halo preparasaun orsamentu ba planu implementasaun ba uma foun.

Prosesu atu implementa UKL tenke tuir pasu sira hanesan estrutura uma-nian mak hanesan aliserse, didin kuartu no kakuluk, kondisaun ekonómika abilidade sosa laiha no rendimentu sosa menus 1,25 kada loron, kondisaun sosiál haree ba idade la produtivu liu-liu tinan 60 ba leten.

Aleinde ne’e, ba feto-faluk ho oan rua ba leten, ema ho difisiénsia, asesu ba eletrisidade no asesu ba bee-moos no estrutura rai hanesan rai laiha disputa, rai privadu bazea ba dokumentu legál hosi SNS no estatus rai la tama iha planu territoriál Estadu nian.

“Ita kumpre pasu haat iha leten ne’e,  ita foin tama iha tékniku. Hosi tékniku ne’e dezenvolve planta kadernu enkargu (BoQ), ita sei prepara akordu implementasaun projetu atu manda ba   Ministériu Finansas (MF) foin hahú prosesu transferénsia hodi halo konstrusaun. Hafoin ami tama iha prosesu aprovizionamentu foin tama prosesu implementasaun,” nia esplika.

Maske implementasaun prosesu UKL ba faze daruak prosesu fizika seidauk hahú maibé tékniku PNDS sira iha terreñu sira finaliza ona halo sensibilzasaun, estabelese ekipa verifikasaun hodi verifika benefisiáriu elizivel iha suku sira-ne’ebé mak liu ona.

“Ita-bo’ot sira hatene ho númeru UKL 278, ita tenke prepara nia BoQ hafoin tun ba trereñu hodi haree medida uma tipu A no B no ita sei ajusta orsamentu tipu uma no mós medida,” nia dehan.

Implementasaun konstrusaun UKL ba faze daruak tinan 2022 hamutuk 278 ne’ebé sei implementa iha suku 30 aldeia 90 postu administrativu hitu ne’ebé pertense iha munisípiu Covalima.

Tuir dadus iha PNDS tinan fiskal 2022 sei kontrui UKL unidade 278 provizóriu   benefisiáriu 1154. Hosi númeru ne’e, uma-kain 251 mak verfika ona no benefisiáriu 30 iha postu administrativu Fatululik, Zumalai no Suai Vila sei halo prosesu reverifikasaun tanba PNDS simu reklamasaun.

Jornalista : Celestina Teles

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here