Koordenadór Sukursál BNCTL Maliana, munisípiu Bobonaro, Cesaltino dos Santos. Imajen Tatoli/Sérgio da Cruz.

BOBONARO, 10 juñu 2022 (TATOLI) – Banku Nasionál Komérsiu Timor-Leste (BNCTL, sigla portugés) Sukursál Maliana, halo mudansa ba oráriu pagamentu subsídiu faze dahuluk tinan 2022 ba idozu no invalidés iha munisípiu Bobonaro hamutuk na’in-9,655 ho totál orsamentu $2,896.500.

Koordenadór BNCTL Sukursál Maliana, Cesaltino dos Santos, hateten tuir oráriu ne’ebé públika ona ba publiku katak, loron (10/06) hahú ona pagamentu ba benefisiáriu sira, maibé  Institutu Nasionál Seguransa Sosiál (INSS) adia.

Notisia Relevante:BNCTL propoin instala ATM P24 iha Bobonaro no Batugade

“Ami simu informasaun katak Diretora INSS hato’o ona ba ami-nia divizaun operasionál iha kanselamentu, maibé BNCTL hein de’it orientasaun hosi INSS foin bele halo pagamentu, ne’ebé data atu hahú pagamentu ne’e ita seidauk hetan,” nia informa ba jornalista sira, iha kna’ar fatin, Maliana, sesta ne’e.

Tuir oráriu ne’ebé BCNTL trasa ona katak prosesu pagamentu sei hahú uluk iha postu administrativu Cailaco ne’ebé sei lansa ofisiál hosi Primeiru Ministru VIII Governu Konstituisionál, Taur Matan-Ruak ho totál benefisiáriu hamutuk na’in-1.112 mai hosi suku Purugua 114, Atudara 133, Goulolo 137, Genulai 67, Da-Udu 54, Meligo 276, Manapa 171 no suku Raiheu 160.

“Ami iha Cailaco ne’e lansa de’it iha suku ida mak depois tuir mai fali iha Maliana vila, ita sei ba direita halo levantamentu sede suku tanba tinan-tinan sempre hanesan ne’e ho razaun ita lakohi inan-aman sira labele mai forma mai atrapalla fali iha edifísiu, se lae serbisu seluk labele la’o ona,” nia hatutan.

Cesaltino reforsa, mekanizmu pegamentu mak funsionáriu BCNTL sei tún direita ba iha sede suku, maibé haree kondisaun klima, suku sira-ne’ebé mak iha liu área rurál bainhira udan  karreta labele asesu ba estrada entaun sei konsentra de’it iha fatin sentru ida.

Purtantu ba benefisiáriu ne’ebé antes ne’e asesu ona kartaun  Automatic Teller Machine (ATM) bele mai foti direita iha mákina ne’ebé instala ona iha kapitál Maliana, enkuantu ba sira-ne’ebé moras labele movimentu bele delega reprezentante família ida mak mai simu osan.

“Maibé reprezentante ne’e tenke ba sede suku atu xefe suku hasai deklarasaun ida prienximentu hosi administradór postu sira ‘visto pelo’ nune’e ami bele konsidera, no reprezentante ne’e mós tenke aprezenta ninia identidade hanesan kartaun eleitorál orijinál no Billete Identidade,” nia esplika.

Atu hafasil kliente sira foti osan fasil no lais liután BCNTL sukursál Maliana daudaun ne’e instala ona mákina Point Of Sales (POS) iha loja sira iha postu administrativu Atabae, Balibo, Cailaco Maliana no tuir planu sei instala mós iha postu admnistrativu Bobonaro no Lolotoe.

“Maibé ami sei identifíka lai loja sira-ne’ebé hakarak sai ami-nia agen ninia cas pro ne’e sufisiente ka lae atubele atende kliente barak, liuliu hanesan tempu pagamentu ba idozu sira. Sé sufisiente tempu tuir mai kliente sira bele halo levantamentu uza kartaun ATM mak asesu, kartaun seluk labele, fasil loos, la presiza mai iha edifísiu ona,” nia argumenta.

Tuir dadaus ne’ebé BNCTL simu hosi INSS benefisáriu na’in-9,655 komposta hosi invalidés 614 no idozu 9.141 mai hosi postu administrativu Atabae  na’in-1,086, Balibo 1,504, Cailaco 1,112, Maliana 2,231, Bobonaro 2,858 no postu administrativu Lolotoe hamutuk na’in-864.

Notisia Relevante:Idozu-invalidés ne’ebé moras, BNCTL sei halo pagamentu iha uma

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here