Koordenadór BNCTL Sukursál Maliana, Cesaltino dos Santos. Imajen Tatoli/Sérgio da Cruz.

BOBONARO, 01 marsu 2022 (TATOLI) – Koordenadór Sukurál BNCTL Maliana, Cesaltino dos Santos, propoin ba BNCTL nasionál atu instala mákina Automatic Teller Macine (ATM) ho tipu P24 iha Bobonaro Vila no Batugade nune’e fasilita kliente sira.

Daudaun ne’e mákina ATM hosi BCTL iha kapitál Maliana ne’ebé fasilita hela kliente sira foti osan hamutuk rua kompostu hosi tipu ATM lokál ne’ebé instala iha edifísiu Administrasaun Munisípiu Bobonaro nia sorin no mákina tipu P24 ativu hela halo atendimentu iha edifisiu BCTL, sukursál Maliana.

Maibé mákina rua ne’e la sufiensite atu akumula kliente hotu iha munisípiu Bobonaro, nune’e iha data tranferénsia direitu mensál, kliente sira tenke forma to’o kalan mak foin bele foti osan.

“Tanba ne’e iha tinan kotuk ami halo diskusaun ona ho ami-nia diretór sira iha nasionál, ha’u mak propoin karik monta ida iha Batugade no ida mós sei monta iha Bobonaro Vila,” Koordenadór Sukurál BNCTL Maliana, Cesaltino dos Santos, informa ba Tatoli, iha suku Lahomea, tersa ne’e.

Nia dehan, planu ne’e parte superiór BNCTL aprova ona katak iha tempu badak sei halo instalasaun uluk iha pontu entrada fronteira Mota-Ain, suku Batugade, postu administrativu Balibo, nune’e bele kobre mós kliente sira hsi postu adminístrativu Atabae ho totál suku haat.

Maske nune’e maibé instalasaun iha postu administrativu Bobonaro vila, nia parte seidauk hetan resposta ruma husi nasionál, maibe planu refere sei kontinua implementa iha futuru nune’e bele fó atendimentu hanesan ba kliente sira hotu iha munisípiu Bobonaro.

“Ami atu instala iha Bobonaro ne’e atubele perkore mós kliente sira hosi Lolotoe no Atsabe, tanba ita-nia kliente sira-nia preokupasaun iha tempu udan estrada ladi’ak, sira labele mai to’o iha Maliana,” nia katak.

Jerente ne’e mós husu ba kliente sira-ne’ebé daudaun ne’e sei utiliza hela kartaun ATM lokál atu hakbesik ba edifísiu BNCTL hodi trata kartaun ho tipu P24 nune’e bele asesu mós iha Banku Nasionál Ultramarinu (BNU) ne’ebé instala hela iha edifísiu Timor Telekom (TT) Maliana no banku sira iha munisípiu seluk.

Marçelo dos Santos nu’udar kliente hosi Atabae rona informasaun ne’e sente kontente tanba  BNCTL bele rona ona sira-nia preokupasaun  hodi fasilita foti osan ho distánsia ne’ebé besik.

“Ami espera planu sira-ne’e bele realiza lalais iha tempu badak, tanba ami mai hosi postu administrativu ne’e fulan-fulan tenki mai Maliana mak foti osan, ate kuandu tempu udan ne’e mota boot dalan kotu tán susar loos,” nia akresenta.

Tuir dadus kliente BCTL iha munisípiu Bobonaro ho totál postu adminístrativu neen  ne’ebé utiliza kartaun ATM na’in-28,316  kompostu hosi kategoria depozita orden, depozita labarik, poupansa imigrante, depozita pesionista no idozu sira la inklui funisionariu sira no sira-ne’ebé kréditu.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here