Edifísiu BNCTL sukursál Maliana, Imagen Tatoli/Sérgio da Cruz.

BOBONARO, 29 juñu 2021 (TATOLI)—Funsionáriu hosi Banku Nasionál Komérsiu Timor-Leste (BNCTL sígla portugés), sukursál Maliana, sei halo pagamentu ba idozu no invalidés ne’ebé moras, iha idaidak nia uma.

“Bainhira sira la mai, ami sei halo pagamentu iha suku. Ita-nia funsionáriu-sira sei ba halo pagamentu to’o uma liu-liu ba inan-aman sira ne’ebé la’o labele no moras todan,” Koordenadór BNCTL sukursál Maliana, Cesaltino dos Santos hateten ba jornalista Agência Tatoli, tersa ne’e.

Notísia relevante:COVID-19 aumenta, INSS-BNCTL sei prodús ATM ba idozu sira

Mekanizmu pagamentu sei halo de’it iha suku, maibé BNCTL mós fó oportunidade ba benefisiáriu-sira atu trata karatun ATM, maibé la obrigatóriu tanba atu hafásil de’it oinsá foti osan ho lalais.

Iha fatin hanesan benefisiária, Marta da Costa, kontente ho atendimentu BNCTL, tanba fasilita-sira hodi trata kartaun ATM, nune’e bele foti iha estasaun ne’ebé estabelesidu iha Maliana laran ho laisliu.

“Agora uza ATM de’it ne’e la presija ba forma ona, ida ne’e diak tebes no la hanesan antes ferik katuas sira tenke forma kleur to’o balun oin halai,” nia hateten.

Dadus ne’ebé Ministériu Solidariedade Sosiál no Inkluzaun (MSSI), fornese ba BNCTL,  sei halo pagamentu ba idozu no invalidés iha munisípiu Bobonaro hamutuk suku 50 ho totál benefisiáriu na’in 9.345.

Hahú 23 juñu, BNCTL sukursál Maliana halo ona pagamentu ba benefisiáriu-sira iha suku haat iha postu administrativu Maliana mak hanesan, Lahomea, Raifun, Ritabou no Odomau.

Tuir oráriu, BNCTL sei konklui pagamentu iha postu administrativu Maliana hafoin bele kontinua ba postu administrativu seluk.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here