Profisionál saúde hala’o hela teste termometru ba bebé ida ho nia inan antes atu sa’e Ró Nakroman atu ba Oé-Cusse. Imajen Tato/Antonio Goncalves ‘Daciparu’.

DILI, 06 juñu 2022 (TATOLI)–Diretór Dirasaun Naisonál Asisténsia Sosiál (DNAS), Lucas Tois, hateten atu asesu programa bolsa da mãe jerasaun foun nian ne’e MSSI husu ba Ministériu Saúde (MS) atu disponibiliza livriñu saúde inan no oan (LISIO) ba inan isin-rua sira.

Notísia Relevante: Governu sei lansa rejista “bolsa da mãe jerasaun foun” iha 17 juñu

“Ita husu ba Ministéru Saúde atu disponibiliza LISIO ba ita-nia inan isin-rua hodi bele fasilita sira, rejistu iha fasilidade saúde ne’ebé mak besik sira nune’e labarik sira bele asesu ba programa bolsa da mãe jerasaun foun,” Lucas Tois hateten ba Agência TATOLI, iha nia knaar fatin Caicoli, Dili, segunda ne’e.

Tuir nia, programa “bolsa da mãe jerasaun foun” nia kritériu ida mak tenke aprezenta livriñu saúde inan no oan (Lisio) hosi inan isin-rua sira no ba labarik infánsia sira hosi 0-3 no kontinua ho idade 6.

“Maibé labarik ho idade 0-3 kontinua idade 6 mós sei presiza tan kartaun batizmu ka RDTL inklui inan nia kartaun elitorál ka BI, depois ho kaderneta banku nian ho númeru telefone mak bele rejistu ba programa bolsa da mãe jerasaun foun nian iha Ainaro, Bobonaro, Rejiaun Administrasaun Espesiál Oé-cusse (RAEOA),” nia dehan.

Diretór ne’e hatutan, pagamentu ba kada fulan sei hahú hafoin aplikasaun hetan aprovasaun, nune’e sei tama ba konta bankária ne’ebé nomea ka kria ona.

Maibé subsídiu inan isin-rua sei para, bainhira inan partus, se inan hetan abortu maibe nia sei hetan nafatin no kontinua to’o estimasaun loron partus nian.

Subsídiu ba labarik inklui labarik ho defisiénsia sira sei para bainhira labarik sira-ne’e to’o ona idade tinan neen (6).

Osan kada fulan ba inan isin-rua hamutuk $15, ba labarik 0-3 kontinua ba idade 6 mak $20 no labarik ho moras króniku ka ho ema ho defisiénsia mak $10.

“Osan ne’ebé mak ita oferese ba ita-nia inan isin-rua ho labarik ne’e atu tulun ba nesesidade loron-loron família nian, hanesan ai-han ne’ebé nakonu ho nutritivu atu promove inan no labarik nia saúde, sosa ai-han ne’ebé saudável,” nia informa.

Dekretu lei númeru 22/2021, ko’alia kona-ba kria subsídiu ba inan gravida no labarik sira, ne’ebé mak hanaran “bolsa da mãe jersaun foun”, ne’ebé mak halo altersaun dahuluk ba dekretu-lei númeru 18/2012, 04 abríl.

Bolsa da mae Jerasaun Foun

Governu nia programa asist’ensia sosiál ba inan isin-rua no labarik ho tinan 0-3, kontinua to’o tinan 6. Iha suplementu adisionál ba labarik sira ho moras króniku ka defisiénsia.

Programa ne’e ho objetivu atu hamenus pobreza, ahdiák saúde no nutrisaun, redús ra’es-badak no haburas ekonomia ba hotu-hotu.

Programa ne’e hahú uluk iha Munisípiu Ainaro, Bobonaro ho Rejiaun Administrativa Espesiál O’e-Cusse Ambeno 9RAEOA iha tinan 2022 no sei haluan neineik ba territóriu tomak.

Rejistu ba subsídiu Inan isin-Rua

Rejistu ba subsídiu inan isin-rua ne’e kada inan isin-rua bele vizita fasilidade saúde, konsulta ho pesoál saúde no aprezenta dokumentu peseoál.

Dokumentu sira-ne’eb’e utiliza ne’e tenke inan-aman sira-nian mak hanesan kartaun eleitorál ka BI ka pasaporte, livrinu saúde inan no oan (LISIO), fixa família (diresaun atuál), kaderneta banku ka konta kankaria no númeru telefone ne’ebé ativu.

Rejistu subsídiu ba labarik

Atu rejistu subsídiu ba labarik ne’e inan-aman sira tenke lori labarik ba vizita fasilidade saúde, konsulta ho pesoál saúde no aprezenta dokumentu ba osfisiál rejistu sira.

Inan-aman tenke hatudu kartaun leitorál ka Bi ka pasaporte, fixa família, kaderneta banku ka konta bankaria no númeru telefone ativu.

Dokumentu ba labarik nian tenke hatudu Livriñu Saúde Inan no Oan (LISIO) no sertidaun moris nian (bainhira posivel).

Rejistu ba Suplementu adisionál

Rejistu ba suplementu adisonál labarik ho defisiénsia ne’e. presiza lori labarik ba vizita fasilidade saúde, konsulta ho pesoál saúde no aprtezenta dokumentu sira ba ofisiál rejistu no dokumentu hanesan ho psosesu rejistrasaun subsídiu ba labarik.

No, dokumentu adisionál mak sertifikadu ka deklarasaun hosi médiku kona-ba labarik nia moras króniku ka defisiénsia iha Livriñu Saúde Inan no Oan (LISIO).

Simu pagamentu

Pagamentu kada fulan sei hahú hafoin aplikasaun hetan aprovasaun. Pagamentu sei tama ba konta bankaria ne’ebé nomea ka konta bankaria BNCTL ne’ebé programa kria ba ita.

Subsídiu ba inan isin-rua sei para bainhira inan partus. Se inan hetan abortu, pagamentu nafatin kontinua to’o estimasaun loron partu nian.

Subsídiu ba labarik, inklui labarik ho defisiénsia sei para bainhira labarik to’o ona tinan neen (6).

Uza osan

Osan hosi subsídiu ne’e sei uza hodi tulun família ba nesesidade loro-loron nian (ai-han, transporte, aimoruk) hodi promove inan no labarik nia saúde no nutrisaun liuhosi;

Sosa no han hahán oioin ne’ebé saudavél; Konsulta ante-natál (ANC) dala ualu (8) no pos-natál (PNC) dala haat (4); Ba fasilidade saúde atu hetan imunizasaun no monitoriza kresimentu; Toba iha muskitériu laran; Fase liman ho sabaun molok han, prepara hahán no hafoin soe bee-boot no bee-kiik.

Notísia Relevante: Labarik asesu edukasaun, MSSI kria programa “Bolsa da Mãe Jerasaun Foun”

Jornalista : Osória Marques

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here