Ekipa selesaun nasionál U-23 Timor-Leste ho naran istimadu “Lafaek”. Imajen/Hortencio Sanchez

QATAR, 29 maiu 2022 (TATOLI)– Ekipa selesaun nasionál U-23, domingu ne’e,  hanesan faze ikus kompleta loron 12 hala’o treinamentu (Training Camp)  iha kampu Qatar University iha Qatar, nune’e ohin arranka bá Cambodia hodi prepara ba jogu amigavél.

“Ohin loron ikus ita halo TC iha ne’e, ida ne’e importante loos, horseik ita nia ekipa halo jogu amigavél kontra Nepal empata 2-2, jogadór sira joga di’ak,  maibé tenke halo di’ak liutan, bainhira ita joga kontra Kamboja,” dehan treinadór prinsipál, Fabio Maciel da Silva ba Agência TATOLI iha Qatar, domingu ne’e.

Notísia relevante: Ekipa U-23 treinu fíziku no tátika kontra-atake iha Qatar

Nia dehan, viájen ne’ebé hala’o hosi Qatar bá Cambodia mak defisil tebes tanba jogadór sira la deskansa barak tanba rute aviaun ne’ebé dook no loron jogu besik tebes.

“Viájen ne’e, difisil tebes tanba jogadór sira sei sai hosi Qatar, hafoin halo tranjisaun iha Aeroportu Thailandia, foin mak viajen fali bá Cambodia too iha ne’ebá kalan boot, jogadópr sira deskansa loron ida de’it hala’o kedan kompetisaun, ida ne’e difisil loos ba jogadór sira atu hatudu jogu ne’ebé di’ak,” nia dehan.

Haree ba servisu lojistika sira hotu Federasaun Futeból Timor – Leste tenke tau atensaun ba buat sira ne’e hotu tanba fó impaktu ba ekipa.

“Maibé ha’u sei halo esforsu oinsa atu jogadór sira bele halo rekuperasaun lais atu bele hatudu jogu ne’ebé di’ak,” treinadór Brazilleiru kompromete.

Tuir oráriu Federation International Football Assosiation (FIFA) jogu amigavél entre nasaun rua ne’e sei hala’o iha Estádiu Nasional Kamboja 02 juñu mai ne’e.

Total jogadór daudaun ne’e hamutuk na’in-21 kompostu hosi guarda rede na’in-rua no avansadu, mediu, defeza na’in 19.

Notísia relevante: Jogu amigável iha Qatar, TL empata 2-2 ho Nepal

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here