Ekipa U-23 TL hasai foto bainhira hala’o joga amigável ho Nepal iha Estádiu Al Arabi Qatar. Imajen Tatoli/Hortencio Sanches.

QATAR, 28 maiu 2022 (TATOLI) – Ekipa U-23 Timor-Leste empata ho Nepal iha jogu amigável hala’o sábadu kalan, ne’ebé hala’o iha Estádiu Al Arabi Qatar.

Jogu primeira parte hahú ekipa rua lansa kedas kontra no atake ba malu tuir tékniku no abilidade ekipa idak-idak nian.

Timor – Leste halo jogu ho presaun maka’as hasoru Nepal, maibé Nepal hala’o jogu ho ofensivu maibé la konsege manán bola hosi Timor – Leste ho nune’e provizóriu Timor – Leste domina bola ho tékniku ne’ebé brillante.

Ho tékniku di’ak ne’ebé sira hatudu la lakon leet de’it tanba iha menutu 43 jogadór Jhon Frith (6) lees uluk ona golu hodi muda rezultadu ba 1-0.

Golu ne’ebé Jhon halo furak tebes tanba nia halo jogu individu hodi fintas defeza sira hotu no konsege fintas mós guarda-rede Nepal nian monu nune’e nia hatama bola ba rede laran.

Ho golu ne’e halo prestasaun jogu manas liután ho nune’e iha menutu 45+1 jogadór Anizio Coreia (9) finaliza t’an golu ida liu hosi bola pasa ho kalma ne’ebé nia simu hosi Mouzinho de Lima (10) nune’e Anizio remata ho golu ida tán muda rezultadu ba 2-0.

Tama ba segunda parte ekipa rua nafatin halo kontra no atake,maibé Nepal halo mudansa totál ba nia estratéjia, liuliu iha jogu parte klaran nian ho nune’e halo presaun maka’as hasoru no hamate Timor-Leste nia jogu iha liña oin no kotuk.

Haree ba jogu Nepal nian iha mudansa ne’ebé maka’as, treinadór na’in-rua Silas Paixão no Fabio Maciel da Silva tenta halo mudansa uitoan hodi dada sai defeza João Bosco Hale (16) hatama fali Nelson Viegas (2) maibé Nepal nafatin domina jogu.

Ho nune’e estratéjia kontinua muda hodi dada sai jogadór avansadu Anizio Correia (9) hodi dudu tama Kefi (11) maibé la iha mudansa jogu too minutu 48 jogadór Nepal ho numeru kamizola 14 lansa golu dahuluk.

Golu ne’e halo jogadór Timoroan sira-nia vontade komesa tún ka bele dehan “mental down” hodi husik leet de’it ekipa adversáriu halo presaun maka’as.

Treinadór Fabio iha li’ur la tur nonok de’it tenta halai ba-mai iha kampu ninin hodi hakilar jogadór sira fó orientasaun maibé jogadór sira nafatin laiha konsentrasaun hodi halo jogu sai aat liután.

Ho nune’e, nia dada sai jogadór Gustavo (17) hatama fali Yohanes Capitan (12) maibé laiha mudansa nafatin ba jogu tanba jogadór sira ladún rona malu iha kampu laran, halo treinadór Brazileiru ne’e hirus liután tanba jogadór sira la rona no la halo tuir saida mak treinadór ne’e orienta.

Ho nune’e nia dada sai tan defeza Gunario Morreira hodi hatama fali jogadór Don Braz (8) maibé laiha mudansa no iha minutu 67 jogadór Nepal númeru kamizola 10 finaliza golu ida tan muda rezultadu empata 2-2.

Hosi golu ne’e mak termina ekipa rua nia jogu tanba too menutu jogu nian hotu laiha tan ekipa ida mak prodús tan golu ho nune’e ekipa rua empata 2-2.

Tanba ne’e kapitaun ekipa Filomeno Junior (18) hateten, esforsu sira halo hotu maibé rezultadu jogu mak nune’e maibé ba oin sei halo di’ak bainhira kontra Kambodia.

“Buat hotu ami halo maibé jogu mak hanesan ne’e, maibé iha jogu amigável hasoru Kambodia agora ami sei halo di’ak liután atubele manán,” kapitaun ne’e hateten.

Jornalista   : Hortencio Sanchez

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here