Atleta Atletismu Felisberto de Deus simu prémiu husi governu. Foto Tatoli/Cidalia Fatima

DILI, 28 maiu 2022 (TATOLI)– Governu Timor-Leste liu husi Sekretariadu Estadu Juventude no Desportu (SEJD) atribui  prémiu ba atleta nain haat (4) ne’ebé konsege hetan medalia lima (5) iha festa desportivu SEA Games (Southeast Asian Games) 2021 iha Vietname.

Sekretáriu Estadu Juventude no Desportu, Abrão Saldanha hateten prémiu ne’ebé mak  governu oferese bá atleta sira tuir diploma Ministerial no mós hetan konkordansia husi entidades desportivu nian sira hahu husi Komisaun, Konfederasaun inklui reprezentante atleta no treinador sira.

Notisía relevante :Delio okupa segundu lugar boxe SEA Games

“Tinan ida ne’e SEJD oferese prémiu tipu rua, prémiu ekselensia no eksensional para bolsa estudu desportivu. Pratika uluk fó deit prémiu ekselensia no agora governu hakarak estimula no dudu atleta nia prestasaun atribui prémiu foun ne’e”, esplika SEJD, Abrão Saldanha iha serimoni Jantar hamutuk ho atleta sira iha restaurante Coffeto Metiaut, sexta ne’e.

Governante ne’e esplika, kareira desportu ne’e hanesan pozisaun temporariu maibé oinsa para joven sira ne’e futuru bele grantia mak governu presiza mós tau matan ba sira nia estudu  no  ida ne’e hanesan inovasaun ida hodi rekoñese atleta sira nia esforsu

Atleta nain haat (4) ne’ebé hetan prémiu konsege lori fila medalia lima (5) husi SEA Games 2021 ne’ebé mai husi modalidade desportivu tolu (3) hanesan Atletismu, Boxing no Taekwondo.

Notisía relevante :Felisberto, atleta dahuluk hamorin Timor-Leste iha SEA Games

Atleta Atletismu Felisberto de Deus hetan medalia osan mutin rua (2) husi halai metro 5.000 no 10.000 no simu prémiu hamutuk $15.000.00 ne’ebé kompostu husi prémiu ekselensia $10.000 no bolsa desportivu $5.000.

Atleta Boxing, Delio Mozinho hetan medalia osan mutin ida (1) hetan prémiu $ 7.500.00 ($5.000 prémiu ekselensia no $2.5000 bolsa desportivu).

Nune’e mós ho Atleta rua ne’ebé oferese medalia osan metan rua (2), José da Silva hanesan Atleta Boxing no Atleta Taikwondo, Santina S.Fernandes, kada ema hetan prémiu ho nia valor $ 4.500.00 ($3.000 prémiu ekselensia no $1.5000 bolsa desportivu).

Entertantu, iha oportunidade ne’e SEJD mós oferese prémiu ba treinador ka ekipa tekniku ho klubu husi modalidade sira mak hanesan, Atletismu $5.000, Boxing 4.000.00 no Taikwondo $1.500.

Hafoin simu prémiu husi governu, Atleta Atletismu, Felisberto de Deus agradese bá governu ne’ebé lidera husi Primeiru Ministru, Taur Matan Ruak hodi entrega ona prémiu hodi rekoñese sira nia esforsu iha SEA Games 2021 iha Vietname.

“Prémiu ne’ebé simu ona ha’u rai hodi uza bá futuru oin mai no sei uza ba treinamentu loron-loron,” hatete Felisberto de Deus.

Nune’e mós, Atleta Boxing, Delio Mouzinho agradese ba SEJD no promete sei hatudu rezultadu di’ak iha SEA Games tinan oin mai tanba governu rasik iha ona planu hodi haruka atleta boxing ba treinu iha Cuba no Filipina.

“Ha’u la promote hodi lori fali medalia osan mean maibé ho sei esforsu aan liu tan no husu ba Governu labele hare de’it ba prémiu maibé tenke kria fatin ba atleta sira hodi treinu,” dehan Nia.

Tuir dadus husi SEJD, iha atleta 38 mak reprezenta Timor-Leste partisipa iha SEA Games 2021 iha Vietanem ne’ebé kompostu husi atleta 25 iha modalidade futebol no atleta 13 seluk husi modalidade Taekwondo, Boxe, Natasaun (Nani), Karate, Halterofilismu (Hit Besi) no Kurida (Halai).

Jornalista: Cidalia Fátima

Editóra  : Armandina Moniz

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here