Boxista timor-oan, Delio Anzaqeci Mouzinho. Imajen/Espesiál

QATAR, 23 maiu 2022 (TATOLI)—Boxista timor-oan, Delio Anzaqeci Mozinho, la susesu sai primeiru lugar iha finál jogu boxe iha Jogu Sudeste Aziátiku (SEA Games, sigla inglés) ba dala-31 tinan 2021, ne’ebé hala’o iha gináziu nasionál Vietname domingu ne’e.

Iha jogu ne’e, atleta Timor-Leste uza roupa kor azul no Filipina kor mean.

Hahú jogu, atleta na’in-rua la’o iha rin leten no sira utiliza kedan tékniku, tuku no tahan, ne’ebé durante ne’e treinadór sira fó treinu, atu buka manán no hamorin nasaun nia naran iha jogu rejionál ne’e.

Boxista Filipina, Eumer Marcial lansa kontra liuhosi tuku tutuir malu ba Delio, maibé atleta timor-oan ne’e só uza de’it liman tahan hasoru tanba pankada hosi Filipina maka’as tebes.

Notísia relevante: Delio Anzaqeci “tuku monu” Boxista Kamboja iha ronde daruak

Pankada hirak ne’ebé atleta Filipina halo la halakon esperansa Delio, hodi lansa kontra no atake maka’as hasoru Eumer, maibé tuku hirak ne’e la kona iha alvu.

Ho kbiit naton, Delio la konsege halo pankada kona Eumer, to’o minutu ikus, ronde primeiru nian atu termina no Delio tenke simu pankada maka’as ida hosi Eumer, halo nia oin halai oituan no jogu labele kontinua ona no termina iha ronde primeiru, nune’e vitória hela ba Filipina.

Tanba ne’e, medalla osan mean hela ho atleta Eumer, enkuantu Delio simu medalla osan mutin.

Delio hanesan boxista ho klase laying senior (69kg), ne’ebé prepara hosi Federasaun Boxe Amadora Timor-Leste (FBATL) atu kompete iha SEA Games.

Iha eventu internasionál ne’e, Delio esforsu defende bandeira Timor-Leste atu labele hase le’et de’it iha ema nia nasaun, maibé tenke hatudu rezultadu ruma.

Nune’e, hatudu realidade tanba konsege hamonu nasaun jigante ida nia atleta monu tun la hader iha ronde segundu.

Iha ronde primeiru, Delio konsege halo pankada maka’as ida ba atleta Kamboja ne’e, maibé oin halai de’it la konsege monu. La’ós ne’e de’it, atleta timor-oan ne’e mós simu pankada hosi boxista Kamboja  maibé la halo Delio monu no ikus mai Delio mak manán. Maski nune’e, ikus mai Timor-Leste tenke derrota kontra Filipina.

Nune’e, Delio agradese ba maluk timor-oan no Governu ne’ebé apoiu tebes nia to’o ikus hetan segundu lugar.

“Ha’u orgullu bele hamorin ita-nia nasaun nia naran. Ha’u agradese ba ema hotu ne’ebé apoiu orasaun mai ha’u, liu-liu Governu ne’ebé durante ne’e apoiu,” Delio espresa nia sentimentu liuhosi nia pájina:

Nia husu deskulpa ba povu Timor-Leste hotu tanba nia la konsege okupa primeiru lugar, maibé ho otimista, tempu seluk nia sei esforsu hodi okupa primeiru lugar.

“Ha’u husu deskulpa ba ema hotu ne’ebé suporta ha’u, ha’u sei esforsu-an maka’as atu hatudu rezultadu di’ak atu hetan primeiru lugar,” Delio dehan.

Jornalista  : Hortencio Sanchez

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here