Jogu sub-23, Ex Kodim manán Maliana United 8-6
BOBONARO,28 maiu 2022 (TATOLI)— Kompetisaun jogu futeból sub-23 iha faze oitavu finál ne’ebé realiza iha kampu Futeból Maliana, sábadu ne’e, Klube Ex Kodim hosi suku Ritabou susesu manán ekipa adversáriu Maliana United (MU) liuhosi sutu penalidade ho rezultadu eskore 8-6.
Iha minutu dahuluk, ekipa rua lansa kedas kontra-atake ba malu ho idak-idak nia tékniku no tátika jogu hodi hetan vitória. Maski ekipa rua jogu tensaun aas, maibé la rezultta golu ida iha jogu minutu dahuluk.
Notisia Relevante:Jogu sub-23 iha Maliana, MU derrota 4-2 kontra Sobo-ai
Hakur ba segundu parte ekipa rua nafatin iha vontade lansa kontra atake ba malu, MU mai ho jogu ofensivu halo bola barullu iha lina oin hodi fó oportunidade barak ba avansadu Gabriel Omar (11) no Farzio (10) lansa sutu barak,maibé sutu hirak ne’e la kona alvu tanba guarda rede salva no barak liu sai hosi gurdiaun.
Ho presaun ne’e, halo jogu manas liután, nune’e ekipa Ex Kodim mós halimar fali jogu kalma hodi duir bola barak ba avansadu sira atu prodús golu ba ninia adversáriu, maibe defeza Maliana United metin liu.
Jogu kontinua la’o too minute 40-resin, no ekipa rua kontinua fó presaun ba malu, maibe la akontese golu ruma to’o arbritu deside hakotu segunda parte.
Hafoin minutu segunda parte ramata, Komisaun bolu treinadór hosi klubu rua atu hola dezisaun kontinua kedas ba aumenta jogu minute 30 ka halo sutu penalti, maibé haree ba rai komesa nakaras daudaun ne’ebé treinador sira deside aumenta de’it minute 20.
Ho minute 20 ne’e, halo ekipa Ex Kodim aumenta tan nia ritmu jogu hodi lansa ameasa barak, ikus mai jogu la’o deit minutu tolu jogadór Libori (17) susesu lees golu ida hodi muda rezultadu ba 1-0.
Ekipa MU sofre golu ida ona,maibé adeptu sira nafatin fó korajen no treinadór mós hakas sira tenke jogu lalais no halo bola barulu iha grande área ikus mai presaun ne’e konsege iha rezultadu tanba jogadór defeza Kevin (4), susesu responde golu ida hodi hatur rezultadu ba 1-1. Ho eskore 1-1 ne’e matein too minutu 20 ramata no deside ba penalidade.
Tamna ba sutu penalidade parte komisaun deside fó oportunidade ba jogadór na’in-ualu no rezultadu hatudu katak Joagdor Maliana United na’in-tolu Kevin (4) no Paizito (12) no Rekova (5) la susesu ezekuta oportunidade brillante ne’e ho susesu.
Enkuantu jogadór Ex Kodim númeru (10) mak fala suta penalty, nune’e vitória ba EX Kodim hodi hakat ba oitavu final no Maliana United tenke simu konsikuénsia fila ba uma.
Jogu ne’e lidera hosi árbritu Lucas Feliz, asistente primeiru Longuinhos ‘Gepeng’, asistente segundu Mateus Marques da Cruz no árbritu suplente Domingos Vicente ‘Juragan’.
Notisia Relevante: Jogu sub-23, Focadioma derota kontra Maliana United 3-0
Jornalista : Sérgio da Cruz
Editór : Florencio Miranda Ximenes
