Ekipa klubu rua ne’e lansa hela kontra atake ba malu. Imajen Tatoli/Sérgio da Cruz. Imajen Tatoli/Sérgio da Cruz.

BOBONARO, 23 maiu 2022 (TATOLI) – Ekipa klubu jigante hosi kapitál Maliana, Maliana United (MU) derrota ho rezultadu 4-2 kontra klubu Sobo-ai hosi suku Oe-leu, postu administrativu Bobonaro, iha jogu sub-23 époka 2022 nian.

Liuhosi esforsu no kosar metan-sulin iha kampu Futeból Maliana, segunda ne’e, avansadu Sobo-ai, Artur Soares susesu marka golu tolu ‘hattrick’ hodi lori nia klubu lidera grupu B hafoin halakon Maliana United (MU) ho rezultadu 4-2.

Maske kampu futeból Maliana ‘bele dehan’ na’in mak Maliana United, maibé laiha preparasaun téknika, entaun ekipa klubu Sobo-ai hosi suku Oe-leu, mai ho objetivu hamoe MU tanba manán golu barak alias 4-2. Ne’e nu’udar derrota boot ba klubu hosi kapitál Maliana ne’e.  

Bainhira jogu hahú iha menutu dahuluk, ekipa estimada hosi suku Oe-leu alias mai hosi foho Sobo-ai nia hún, postu administrativu Bobonaro no ekipa jigante hosi kapitál Maliana Vila ne’e lansa kedas kontra ataket uir tékniku klubu idak-idak nian.

Notisia Relevante:Jogu sub-23 iha Maliana, Soboai tebe-sai Focadioma hosi grupu B

Ho esforsu hirak-ne’e, rai mós komesa manas ba daudaun halo  ekipa rua mai ho ritumu aas hodi lansa ameasa ba malu ho objetivu atu prodús golu ruma iha menutu 10, maibé sorte di’ak monu uluk ba klubu mai hosi dook ne’e, tanba iha menutu 28 avansadu Sobo-ai, Artur Soares (10) susesu lees uluk rede adversáriu liu hosi bola-ulun nune’e rezultadu ba 1-0.

Liu hosi golu ne’e halo situasaun kampu manas liután tanba adeptu sira hosi klubu rua ne’e fó korajen ba jogadór sira atu oferese golu, maibé Maliana United mak forte liu tanba iha menutu 28 jogadór Mouzinho (13) susesu responde golu liuhosi bola barullu iha baliza oin hodi hatuur rezultadu ba 1-1.

Hare ba rai manas halo jogadór sira lakon enérjia barak, nune’e obriga treinadór Sobo-ai Vitorino  Gusmao, muda hanoin sobu fali estratejia, dada Sidonio Lopez (11) hatama fali António Soares ‘Maradona’ (7) nune’e molok termina jogu primeira parte iha menutu 41, jogadór foin tama ne’e ho estamina forte ne’e susesu fura kedas golu ida liuhosi sutu livre hodi aumenta rezultadu ba 2-1.

Tama ba segunda parte, ekipa rua komesa iha fali enérjia hodi lansa ameasa ba malu, MU halo esforsu másimu tebes iha lina karuk no oin.

Ho presaun ne’e halo Sobo-ai hasa’e tán sira-nia ritmu jogu, katak soe bola-aas barak liu ba oin halo kontra atake nune’e jogu foin la’o menutu ualu, Artur Soraes (10) lees tán golu ida hosi dudu rezultadu ba 3-1.

Nune’e jogador Sobo-ai badinas liután buka bola soe beibeik bola ba oin nune’e oportunidade monu tán ba Artur Soares susesu pankada tán golu ida hodi aumenta rezultadu ba 4-1. Ho golu ne’e avansadu ne’e susesu hetan títulu ‘hattrick’.

Haree ba ekipa hosi suku Oe-leu kontente, halo ekipa hosi kapitál Maliana ne’e mós lakohi lakon de’it ho pontu ida, nune’e treinadór MU obriga ninia ekipa sobu maka’as defeza adversáriu, maibé asaun ne’e konsege iha duni rezultadu tanba iha jogu foin la’o de’it menutu lima, Gabriel Omar (11) lees fali golu ida hodi muda rezultadu ba 4-2, maibé rezultadu refere mantein to’o jogu termina, nune’e vitória ba Sobo-ai lidera Grupu (B), Maliana United okupa iha segundu lugár hakat ba oitavu finál.

Treinadór Sobo-ai, Vitorino Gusmao, sente kontente ho rezultadu ne’ebé nia ekipa gaña no rekoñese jogador sira lakon estamina barak tanba rai manas, nune’e promete jogu tuir mai sei esforsu halo preparasaun fíziku di’ak liután.

“Ha’u-nia jogadór sira-nia preparasaun durante ne’e ladún másimu, maibé ha’u sente jogu ida ohin di’ak tebes tanba jogadór sira badina buka bola maske rai manas. Rezultadu ohin ne’e hanesan onra boot ida tanba antes ne’e ema ‘remekan’ ami más ami konsege hatún duni ekipa iha kapitál ne’ebé sai na’in ba kampu ne’e rasik,” nia hateten.

Jogu ne’e lidera hosi árbitru Jefriano Loy Maya dos Santos, asistente primeiru ‘Gepeng’, asistente segundu Julito de jesus no árbitru Suplentu Domingos Vicente. Enkuantu árbitru hirak-ne’e hetan ona sertifikadu lisensa (C) no (D) hosi Federasaun Futeból Timor-leste (FFTL) iha tinan 2020 no 2021.

Notisia Relevante:Jogu sub-23, Focadioma derota kontra Maliana United 3-0

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here