Defeza Focadioma xuta hela bola ba área Maliana United, iha kampu futeból Maliana, munisípiu Bobonaro, domingu (15/05). Imajen Tatoli/Sérgio da Cruz

BOBONARO, 15 maiu 2022 (TATOLI)–Klube Focadioma hosi suku Tapo-memo, domingu ne’e, obrigatóriu tenke sofre golu tolu kontra klube adversáriu Maliana United (MU) iha jogu futeból sub-23 époka 2022, iha loron daruak, ne’ebé realiza iha kampu futeból Maliana, munisípiu Bobonaro.

Iha minutu dahuluk, hahú ekipa rua lansa kedas kontra atake ba malu tuir tékniku no tátika ida-idak nia no ekipa rua mai ho jogu modelu ofensivu, maibé MU fó uluk presaun  iha minutu 10 ba leten hodi halo defeza Focadioma atrapalla oituan tamba sobu maka’as hosi liña loos no karuk.

Hosi presaun ne’ebé MU lansa, la hela de’it hanesan buat mamuk ida, tamba iha minutu 20 Avansadu Gabriel Omar (11) susesu fura uluk rede Focadioma hodi muda rezultadu ba 1-0 liuhosi xuta livre.

Notisia relevanteAbertura jogu sub-23 iha Maliana, Ex Kodim manán FC Cruz 2-1

Ekipa rua hadau malu hela bola, Maliana United farda Mean no Focadioma farda azul, i iha kampu futeból Maliana, munisípiu Bobonaro, domingu (15/05). Imajen Tatoli/Sérgio da Cruz

Ho golu ne’e, halo ambiente kampu manas liután no ekipa rua kontinua lansa kontra ataka ba malu, ne’ebé Focadioma lansa ameasa barak ba rede MU mai ho tensaun atu prodús golu, maibé xuta hirak ne’e la kona alvu to’o árbritu deside hakotu jogu parte dahuluk, hodi la akontese golu ruma, nune’e priovizóriu MU lidera 1-0.

Hakur ba parte daruak, ekipa rua kontinua lansa kontra ataka ba malu, maibé MU kontinua forte kontra atake lalais iha liña karuk lansa bola a’as barak liu ba oin, nune’e iha minutu 68, Patricio D,J.M (8) les tan golu ida liuhosi bola ‘muta’ hodi aumenta rezultadu ba 2-0.

Ho golu ne’e, la hamate vontade Focadioma, tamba iha minute 70 ba leten lansa xuta barak ba rede adversáriu, maibé  guarda rede MU, Joel Yohanes (1) konsege salva hotu, nune’e jogu kontininua manas liután.

Enkuantu, Treinadór Focadioma kontinua obriga nia ekipa sobu MU nia jogu, maibé esperansa sira ne’e la konsege atinje tamba defeza metin liu.

Ekipa rua lansa hela kontra ataka ba malu, Maliana United uza farda mean Focadioma uza farda Azul, iha kampu futeból Maliana, munisípiu Bobonaro, domingu (15/05). Imajen Tatoli/Sérgio da Cruz

Jogu la’o tanba haree ba forsa ekipa Focadioma menus tamba udan hotu rai manas kedas, hakbiit tan ekipa MU nia vontade hodi lansa ameasa tutuir malu, nune’e ikus mai ambisaun ne’e la hela de’it ho ambisaun, tamba iha minute 78 Cristiano V,M (9) fura tan golu ida liuhosi xuta livre hodi muda rezultadu ba 3-0 to’o jogu termina la akontese tan golu ruma, nune’e vitória hela ba MU no Focadioma tenke simu realidade lakon.

Entretantu, Jogu ne’e lidera hosi Árbritu Domingos Vicente, Asistente dahuluk Lucas Feliz, Asistente daruak Mateus Marques da Cruz, no Asistente Árbirtu Perigrinho dos Reis, ne’ebé  árbritu hirak ne’e hetan ona sertifikadu lisensa (C) no (D) hosi Federasaun Futeból Timor-leste (FFTL) iha tinan 2020 no 2021.

Tuir oráriu hosi Asosiasaun Futeból Bobonaro, aban loron segunda (16/04), iha jogu parte dahuluk hosi ekipa Jalagovi kontra Monumentu FC iha tuku 14:30 Otl no jogu parte daruak hosi ekipa AS Fition kontra São Miguel iha tuku 16:30 Otl.

Jornalista  : Sérgio da Cruz

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here