Membru PN hosi Bankada FRETILIN, Antoninho Bianco.

DILI, 25 MAIU 2022 (TATOLI)—Vise Bankada Fretilin iha Parlamentu Nasionál, Antoninho Bianco, hateten eis Prezidente Repúblika, Francisco Guterres Lú Olo, la konsege promulga projetu Lei Responsabilidade Prezidente Repúblika ne’e normál.

Notísia Relevante: PN aprova projetu lei Responsabilidade Prezidente Repúblika iha finál globál

“Lae, ami hateten kualker Prezidente Repúblika tenke promulga no mós labele promulga, ida ne’e direitu konstituisional,” Deputadu Antoninho Bianco hateten ba Agência Tatoli iha Parlamentu Nasionál, kuarta ne’e.

Antes ne’e, bankada Governu iha Parlamentu Nasionál halo diskusaun projetu-lei Responsabilidade Prezidente Repúblika ne’e ho karáter urjensia atu eis PR bele promulga mezmu mandatu besik ramata ona maibé to’o mandatu ramata la konsege promulga.

Nune’e, nia dehan, projetu-lei Responsabilidade Prezidente Repúblika ne’e hela ba Prezidente Repúblika atuál, José Ramos Horta, hodi bele tetu no haree.

“La promulga tenke fó razaun devolve la’ós tau iha gaveta. Ba lei kualker, PR simu proposta ho ida projetu-lei hosi Parlamentu Nasionál hetan dekretu hosi PN iha devér konstituisionál veto ka promulga,” nia dehan.

Tuir nia, veto iha buat rua mak polítika no tanba kontra konstituisaun ne’e tenke paresér ruma ba iha Tribunál, tenke iha justifikasaun mai fali iha Parlamentu Nasionál.

Vise Prezidente Parlamentu Nasionál, Maria Angelina Sarmento hateten, Projetu-lei Reponsabilidade Prezidente Repúblika ne’e Parlamentu Nasionál halo aprovasaun urjente haruka ba Prezidente Repúblika sesante Francisco Guterres Lú Olo atu bele hetan promulgasaun.

“Maibé, infelizmente tempu badak liu Prezidente Repúblika Lú Olo la konsege promulga lei ida ne’e, signifika katak lei ida-ne’e tenke pasa fali ba Prezidente Repúblika foun nia liman, atu ninia mandatu mak bele promulga,” nia hateten.

Deputada PLP ne’e hateten, agora Prezidente Repúblika José Ramos Horta iha direitu konstituisionál atu promulga ka veta iha períodu loron 30 nia laran, maibé Prezidente Repúblika mós iha kompetensia atu husu tribunál halo fiskalizasaun preventiva konstituisionalidade ba lei responsabilidade Prezidente Repúblika.

“Ida-nee kabe ba prezidente Repúblika foun ne’e ninian, bele husu ba Tribunál atu foti desizaun konstitusionál ka inkonstitusionál. Kuandu tribunál foti desizaun mak Prezidente Repúblika foti desizaun politika sobre lei responsabilidade Prezidente Repúblika,” nia dehan.

Vise Prezidente Bankada CNRT, Patrocíno Fernandes dos Reis hateten, PR atu promulga ka la promulga ne’e kompeténsia PR nian.

Maibé, tuir nia, pozisaun bankada CNRT nian mak haree katak projetu-lei ne’e laiha fatin atu tama iha entrada ein-vigór, tanba trata des-igualidade ba Titulár Órgaun Soberanu sira, tanba responsabilidade Prezidente repúblika nian regula ona iha konstituisaun, nune’e Parlamentu Nasionál la nesesáriu atu kria tan lei refere.

Notísia Relevante: PN inisia projetu-lei kona-ba responsabilidade Prezidente Repúblika

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here