Imajen/Espesial.

DILI, 24 MAIU 2022 (TATOLI)—Parlamentu Nasionál (PN), tersa ne’e, aprova projetu rezolusaun Parlamentu Nasionál númeru 95/V(4a)-institui loron Nasionál Liberdade Imprensa iha 16 outubru, nune’e kada tinan bele selebra.

Notísia Relevante: Balibo Five, “Tim Susi” sunu jornalista na’in-lima to’o mutuk

“Rezultadu votasaun a-favór 49, kontra no abstensaun 0, nune’e projetu rezolusaun Parlamentu Nasionál númeru 95/V(4a)-kona-ba loron Nasionál Liberdade Imprensa aprovadu,” Prezidente Parlamentu Nasionál, Aniceto Longuinhos Guterres Lopes, deklara liuhosi reuniaun plenária Parlamentu Nasionál, tersa ne’e.

Komemorasaun ne’e hodi fó rekuinesimentu ba jornalista estranjeiru sira-ne’ebé mate iha tempu okupasaun Indonézia ne’ebé halo servisu iha órgaun komunikasaun sosiál oioin hodi fó sai kauza Timor-Leste to’o hetan auto-determinasaun ka ukun rasik an, no liberdade imprensa ba órgaun komunikasaun sosiál, direitu informasaun livre asegura informasaun ne’ebé hatuur ona iha konstituisaun.

Timor-Leste mós hetan indise liberdade imprensa iha nasaun Sudeste Asiátiku di’akliu garante liberdade imprensa, liberdade espresaun no direitu informasaun, tanba ne’e Parlamentu Nasionál institui 16 outubru kada tinan hodi bele komemora loron nasionál ba Liberdade Imprensa.

PN rekomenda ba Governu, iha 16 outubru kada tinan atu promove asaun kampaña informasaun no sensivilizasaun ba importansia liberdade imprensa.

PN apela ba órgaun komunikasaun sosiál, jornalista, Conselho Imprensa de Timor-Leste hodi hili instituisaun ensinu superiór asosia hola parte iha komemorasaun refere ba promotór ativu liberdade imprensa no direitu informasaun.

Proponente ba projetu rezolusaun ne’e aprezenta hosi Deputada PLP, Maria Angelina Sarmento, Deputadu KHUNTOo, António Verdiál de Sousa no Deputadu CNRT, Duarte Nunes.

Deputada proponente, Maria Angelina Sarmento, hateten Timor-Leste selebra loron mundiál liberdade imprensa kada tinan iha 03 maiu, nune’e Timor-Leste kontinua selebra direitu profisionál mídia atu investiga no públika informasaun sira ho forma livre.

Notísia Relevante: Aban, PN diskute no aprova rezolusaun loron Nasionál Liberdade Imprensa

Loron mundiál liberdade imprensa ne’e, nia dehan, kria hosi UNESCO iha 1993 hili 03 maiu atu alerta kona-ba impunidade ne’ebé jornalista sira hetan tortura no asasinadu nu’udar konsekuénsia hosi informasaun públika.

“Timor-Leste ita orgulu tanba ita-nia konstituisaun iha artigu 40 no 41 garante liberdade espresaun no liberdade imprensa ba informasaun. Mídia barak mak públika Timor-Leste nia kauza ba libertasaun nasionál hein katak ita kontinua mantein ida-ne’e no lei sira ita labele tenta atu kontrola meiu komunikasaun sosiál ho dalan halo sensura, tanba ida ne’e hamate liberdade imprensa,” Vise Prezidente PN ne’e hateten

Tuir ranking mundiál liberdade imprensa Timor-Leste okupa pozisaun 17 hosi nasaun 180, tuir nia, ida-ne’e ranking di’ak tebes klasifika Timor-Leste nu’udar nasaun ida-ne’ebé iha sensibilidade ba profisaun jornalista sira-nian entre nasaun 180.

“Ho nune’e pedidu hosi Prezidente Conselho Imprensa de Timor-Leste husu loron ida atu hili ba loron nasionál ba liberdade imprensa no rezolusaun ne’e propoin 16 outubru kada tinan komemora loron nasionál liberdade imprensa, atu hatudu katak ita kumpre konstituisaun no ita-nia polítika sira a-favór ba liberdade imprensa” nia hateten

Iha fatin hanesan, Sekretáriu Estadu Komunikasaun Sosiál (SEKOMS), Mericio Juvinal Akara, hateten parte Governu konkorda rezolusaun PN ne’e.

Governante ne’e hakarak parabeniza servisu jornalista sira-nian mak ohin loron Timor-Leste hetan indise liberdade imprensa mundiál tinan ne’e hatur pozisaun di’ak loos.

Parlamentu Nasionál aprova 16 outubru sai hanesan loron nasionál ba Liberdade Imprensa tanba iha loron 16 outubru 1975 mosu trajédia iha Balibo ne’ebé jornalista australianu no neozelandeze na’in-lima hetan oho hosi militár indonéziu bainhira halo knaar jornalizmu atu transmite ba kanál televizaun australianu, ne’ebé ikusmai trajédia ne’e koñesidu ho naran “Balibo Five”.

Jornalista na’in-lima (5) ne’ebé mate iha trajédia “Balibo Five” ne’e mak hanesan Greg Shackleton (reportér) ho idade 29, Tony Stewart (gravadór lian) ho idade 21, Gary Cunningham (cameraman) hosi mídia HSV-7 (Seven Network) Melbourne ho idade 27, no Brian Peters (cameraman) ho idade 26 no Malcolm Rennie (reportér) hosi mídia TCN-9 (Nine Network) Sydney ho idade 29.

Notísia Relevante: Horta Apoia Inisiativa CI Atu Define Loron Nasionál Liberdade Imprensa

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here