CI halo enkontru ho Premiadu Nobel Dame nian, José Ramos Hora, hodi konsulta kona-ba loron nasional liberdade imprensa. Imajen/Mídia CI

DILI, 16 jullu 2019 (TATOLI) – Konsellu Imprensa (CI-sigla portugés), ohin, halo enkontru ho Premiadu  Nobel Dame nian, José Ramos Horta, hodi husu ideia balun kona-ba inisiativa CI nian atu define loron nasionál liberdade imprensa.

Prezidente CI, Vírgilio da Silva Guterres kaer liman ho Premiadu Nobel Dame nian, José Ramos Horta. Imajen/Mídia CI

Ramos Horta fó apoiu tomak ba vontade no insiativa husi CI  nian ne’e atu bele deside loron ida hodi konsidera nu’udar loron nasionál liberdade imprensa.

“Ohin, ha’u ko’alia ho kolega sira Konsellu Imprensa, husu ha’u nia apoiu, ha’u nia tulun ba loron nasionál liberdade imprensa, klaru ha’u apoiu 100%,” hateten eis Prezidente Repúblika ne’e.

Ramos Horta laiha referénsia ba loron ruma atu determina nu’udar loron nasionál liberdade imprensa, maibé nia husu ba CI atu bele define loron ida hodi konsidera nu’udar loron nasionál liberdade imprensa.

Prezidente CI, Virgílio da Silva Guterres, konsidera Ramos Horta nu’udar figura ida importante hanesan eis Jornalista no Premiadu Nobel Dame nian, hodi husu hanoin ruma kona-ba define loron nasionál liberdade imprensa.

Virgílio esplika, iha referénsia lubuk ida maka CI ho mídia na’in, jornalista, no asosiasaun jornalista sira diskute hamutuk ona hanesan loron 16 Outubru, jornalista na’in lima mate iha Balibo.

Prezidente CI esforsu atu molok mandatu remata iha loron 10 Maiu 2020, bele hatama ona proposta ida ba Governu hodi hetan aprovasaun ba loron nasionál liberdade imprensa.

Antes ne’e, CI hala’o ona enkontru konsultasaun ho mídia na’in, jornalista no asosiasaun jornalista sira hodi rona mós sira nia sujestaun no preokupasaun sira.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here