DILI, 23 maiu 2022 (TATOLI)— Sekretária Meza Parlamentu Nasionál, Deputada Lidia Norberta, informa iha enkontru líder bankada parlamentár, segunda (23/5), deside sei halo diskusaun no aprovasaun ba loron Nasionál Liberdade Impresa.
“Aban ne’e, ita sei iha rezolusaun ida kona-ba loron nasionál ba liberdade imprensa, ne’ebé maka propoin hosi Konsellu Imprensa, iha ne’ebá determia atu loron 16 outobru, sai hanesan loron nasionál imprensa,” hateten Sekretáriu Meza PN ba jornalista sira hafoin ramata enkontru líder bankada iha Parlamentu Nasionál.
Alende ne’e, liuhosi enkontru líder bankada ne’e deside plenária, aprezentasaun relatóriu ne’ebé maka aprezenta direta hosi Komisaun Funsaun Públika (KFP) no mós deside data ba diskusaun konta jerál Estadu ne’ebé sei akontese iha loron 30 no 31 fulan ne’e.
Nune’e mós iha enkontru lider bankada ne’e deside loron resesu ba Deputadu-sira ba fulan rua, ne’ebé hahú hosi loron 15 jullu too 15 setembru.
“Ohin ita laiha plenaria, tanba deit ajenda barak ne’ebé determina tiha iha fulan hirak liu, ne’ebé ita konsege halo to’o iha semana kotuk, liuliu haree liu ba iha ajenda sira antes 15 jullu saida maka ita atu halo,” dehan Sekretariu Meza Parlamentu Nasional, Deputada Lidia Norberta.
Iha enkontru lider bankada ne’e mós deside halo nomeiasaun ba reprezentasaun kandidatu nain rua ba komisaun rekrutamentu Juís ba Tribunál Supremu Justisa. Nune’e iha semana ida ne’e nia laran bankada ualu ne’e tenke aprezenta kandidatu rua ba meza Parlamentu atu Prezidente Parlamentu Nasionál haree.
Deputada ne’e afirma liuhosi enkontru lider bankada mós haree ba pedidu hosi bankada CNRT nian ba iha Ministeriu Públiku husu halo fiskalizasaun susesiva ba Orsamentu Jerál Estadu 2022.
“Parlamentu Nasionál iha loron 30 atu fó response ba MP ba iha pedidu fiskalizasaun susesiva ba Orsamentu Jerál Estadu 2022 no daudaun la’o hela,” nia afirma.
Entretantu, iha enkontru líder bankada deside mos atu hasai imunidade Deputadu Arão Noe Amaral hodi enfreta justisa ne’ebé Parlamentu Nasionál sei halo iha tempu badak. Tanba Ministériu Públiku nian notifikasaun mai ona Parlamentu Nasionál.
Ikus liu, líder bankada diskute atu haree lei protesaun labarik no joven iha perigu ne’ebé Prezidente Repúblika José Ramos Horta husu ona Parlamentu Nasionál hodi aselera nian prosesu aprovasaun lei refere.
Jornalista :Natalino Costa
Editór : Florencio Miranda Ximenes
