Prezidente Konselu Kombatente Libertasaun Nasionál (CCLN, sigla portugés), Vidal de Jesus Riak Leman. Imajen Tatoli/Celestina Teles.

COVALIMA, 23 maiu 2022 (TATOLI)—Prezidente Konsellu Kombatente Libertasaun Nasionál (CCLN, sigla portugés) Veteranu, Vidal de Jesus Riak Leman halo monitorizasaun ba ekipa verfikasaun dadus kandidatu veteranu iha suku Matai, postu administrativu Maucatar, munisípiu Covalima.

Notísia Relevante: Ekipa nasionál hahú hala’o fali verifikasaun dadus veteranu rejistadu 2009

Kandidatu veteranu iha suku Matai, postu administrativu Maucatar. Imajen Tatoli/Celestina Teles.

“Ha’u ho ha’u-nia ekipa mai iha Covalima halo monitorizasaun ba ekipa sira-ne’ebé mak halo verifikasaun dadus ba kandidatu veteran sira iha munisípiu Covalima,” Vidal de Jesus “Riak Leman” hateten ba jornalista sira iha suku Matai, postu administrativu Maucatar, segunda ne’e.

Iha biban ne’e, Riak Leman relata rezultadu verifikasaun dadus iha nivél nasionál liu-liu iha Rejiaun Administrativa Espesiál Oé-Cusse Ambeno (RAEOA ) no  Manufahi finaliza ona halo verifikasaun, munisípiu Ermera iha fulan oin ramata ona, munisípiu Baucau foin mak bele ramata no munisípiu seluk sei halo verifikasaun.

Ekipa komisaun halo verifikasaun dadus kandidatu veteranu sira-ne’ebé hahú rejista iha tinan 2009, maibé ba kandidatu veteranu ne’ebé mak hahú rejistu iha tinan 2003 no 2005 ne’e liu tiha ona.

Hafoin ekipa verifikadór dadus kandidatu veteranu ne’ebé hahú rejista iha tinan 2009 remata sei kontinua halo verifikasaun sira-ne’ebé mak rejistu balun ne’ebé moras  labele partisipa iha verfikasaun.

Prezidente ekipa verifikasaun, Francisco Doutel Sarmento ‘Lamesak’. Imajen Tatoli/Celestina Teles.

Prezidente Ekipa Komisaun Verifikasaun, Francisco Doutel Sarmento “Lamesak” hateten, ekipa verifikasaun durante halo verfikasaun dadus iha postu administrativu Maucatar hahú iha suku Belecasak iha loron 05 fulan-maiu ne’e kandidatu veteranu hamutuk 577 no hosi númeru ne’e, kandidatu dadus veteranu moris verfika ona 192, mate 212 ho transferénsia hodi Bobonaro mai iha Covalima na’in-16

Aleinde ne’e iha loron 17 fulan-maiu ne’e iha suku Matai, postu administrativu Maucatar, ekipa verfikasaun kontinua halo verfikasaun dadus kandidatu veteranu hamutuk 480 no hosi númeru ne’e kandidatu veteranu moris 71, mate 28 no transferénsia 13.

“Totál lista kandidatu veteranu iha suku Matai hamutuk 480, moris 71, mate 28, transferénsia 13 no totál veteran hamutuk 112. Tanba foin lalais iha loron 19 fulan-maiu ne’e ekipa provizóriu sei para halo verifkasaun tanba Timor-Leste komemora loron independénsia Timor-Leste. Entaun, ohin, loron ami kontinua halo verifikasaun,” nia relata.

Nia relata, situasaun  seguransa  durante halo verfikasaun dadus ba veteran sira iha postu administrativu Maucatar, munisípiu Covalima la’o kontroladu tanba la hamosu problema ruma.

Notísia Relevante: Ekipa nasionál verifikasaun dadus veteranu rejistadu 2009 foin verifika 120.000-resin

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here