Prezidente Konsellu Veteranu, Vidal de Jesus "Riak Leman". Imajen TATOLI/Arminda Fonseca.

DILI, 05 janeiru 2022 (TATOLI)—Prezidente Konsellu Veteranu, Vidal de Jesus “Riak Leman”, hateten ekipa nasionál ba verifikasaun ba veteranu sira-ne’ebé rejistadu 2009 iha territóriu nasionál ne’e foin mak to’o 120.000-resin no maiória mak seidauk verifika.

Notísia Relevante: Ekipa Nasionál halo verifikasaun ba dadus veteranu rejistadu iha 2009

“Ita-nia ekipa verifikasun ba veteranu rejistadu 2009 nian, to’o agora foin mak verifika ema h120.000-resin iha territóriu nasionál tanba COVID-19 inklui festa natál no tinan foun entaun ekipa nia servisu sei paradu hela. Orientasaun ne’e hosi Ministru Asuntu Kombatente Libertasaun Nasionál (SEAKLN) maibé orsamentu aloka ona mak ekipa tún ba halo verifikasaun,” Prezidente Konsellu Veteranu ne’e hateten ba Agência TATOLI, iha nia knar fatin Vila Verde, Dili, kuarta ne’e.

Prosesu verifikasaun ne’e sei kleur no han tempu tanba ema barak liu, ho kazu konkretu mak hosi Munisípiu Aileu nian de’it mak ema hamutuk 8.000 maibé foin mak verifika 3.000 no 5.000 seidauk verifika to’o agora.

Hosi ema 120.000-resin ne’e, Riak Leman hateten, Rejiaun Administrastrativa Espaesiál Oé-Cusse Ambeno (RAEOA) mak verifika hotu ona, tanba ema ladún barak mak partisipa iha luta ba libertasaun nasionál.

“Tanba, ita hotu hatene katak laiha baze de apoiu no laiha membru Falintil mak la’o ba-mai iha Oé-Cusse, anaunser sira halo atividade klandestina mak inimigu kaer sira ka kastigu sira. Tanba ne’e mak veteranu menus, nune’e verifikasaun mós hotu lalalis. foin mak RAEOA maibé munisípiu seluk verifikasaun ne;e sei finaliza,” nia dehan.

Maibé, nia dehan, iha tempu badak ekipa nasionál verifikasaun kontinua fali halo verifikasaun ba dadus veteranu rejistadu iha 2009 no ekipa sei esforsu di’ak liután hodi bele aselera no konklui verifikasaun ne’e hodi haruka ba iha nasionál, nune’e ekipa nasionál konitnua verifika ida-ne’ebé mak iha direitu no laiha hanesan veteranu.

Antes ne’e, Governu liuhosi Ministériu Asuntu Kombatente Libertasaun Nasionál (MAKLN) ho nia ekipa validasaun, tersa (03/08) dezloka ba territóriu Timor-Leste hodi halo verifikasaun ba  Kombatente Libertasaun Nasionál ne’ebé rejista iha tinan 2009 sira-nia dadus.

Ekipa ne’ebé atu dezloka ba munisípiu ne’e, sira-ne’ebé mak koñese situasaun veteranu sira-nian no hanesan mós estrutura konsellu munisipál nian, tanba parte nasionál anúnsia ona ba Prezidente no Vise-Prezidente Konsellu Munisipál atu partisipa direta ba prosesu verifikasaun dadus ne’e.

Kona-ba veteranu ne’ebé mak mate ona no maske naran taka sai ona, nia dehan, Governu nafatin fó konsiderasaun atu simu direitu hosi saudozu ne’e rasik.

Maibé, tuir nia, saudozu ka saudozu nia inan-aman ka maun-alin no bele mós ba feen-laen mak iha direitu atu bele subtitui fali, tanba Lei la dehan oan haki’ak atu simu fali direitu ida-ne’e.

Nia informa, veteranu iha territótiu nasionál ne’ebé mak rejistu iha tinan 2009 no sei halo verifikasaun ne’e hamutuk 124.680.

Liuhosi konteúdu ne’ebé mensiona iha Estatutu Kombatente Libertasaun Nasionál, Lei nú. 3/2006, no artigu 13° “Registo da Qualidade de Combatente da Libertação Nacional” sei kontinua hala’o validasaun rejistu ba períodu daruak nian ba rekoñesimentu hanesan Kombatente Libertasaun Nasionál ne’ebé rejista iha tinan 2009.

Notísia Relevante: MAKLN prepara ekipa re-verifika dadus veteranu rejistadu iha 2009

Jornalista : Osória Marques

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here