Prezidente Konsellu Veteranu, Vidal de Jesus "Riak Leman". Imajen TATOLI/Arminda Fonseca.

DILI, 06 maiu 2022 (TATOLI)—Prezidente Konsellu Kombatente Libertasaun Nasionál (CCLN-sigla portugés), Vidal de Jesus “Riak Leman”, hateten ekipa nasionál verifikasaun dadus veteranu rejistadu tinan 2009 nian hahú hala’o fali verifikasaun iha segunda (02/05) liubá ne’e.

Notísia Relevante: Governu verifika dadus veteranu rejistadu 2009 atinje ona 48,3%

“Ita-nia ekipa verifika dadus veteranu rejistadu 2009 ne’e hahú ona iha 02 maiu liubá ne’e. Maske suspende kleur ona maibé ita nafatin esforsu no oinsá para bele konklui verifikasaun iha tinan ne’e. Tanba, ita sei iha 52% mak seidauk verifika no parte Ataúro mak seidauk hahú, tanba kestaun ró,” Vidal de Jesus “Riak Leman” hateten ba Agência TATOLI, via telefónika, sesta ne’e.

Responsável ne’e hatutan maske sei iha 52% maibé ekipa verifikasaun iha esperansa no garante katak sei finaliza dadus veteranu rejistadu 2009 tuir kalendáriu ne’ebé mak iha.

Veteranu iha territótiu nasionál ne’ebé mak rejistadu iha tinan 2009 no halo hela re-verifikasaun ne’e hamutuk 124.680.

Liuhosi konteúdu ne’ebé mensiona iha Estatutu Kombatente Libertasaun Nasionál, Lei nú. 3/2006, no artigu 13° “Registo da Qualidade de Combatente da Libertação Nacional” sei kontinua hala’o validasaun rejistu ba períodu daruak nian ba rekoñesimentu hanesan Kombatente Libertasaun Nasionál ne’ebé rejista iha tinan 2009.

Antes ne’e, Diretór Departamentu Prensaun no Sobrevivente, Manuel dos Santos, informa Governu liuhosi Ministériu Asuntu Kombatente Libertasaun Nasionál (MAKLN) verifika ona dadus veteranu rejistadu 2009 ne’e atinje ona 48,3%.

Nia informa, verifikasaun ne’ebé hahú kedas iha 2019 to’o ohin loron ne’e valida ona 48,3% hosi veteranu rejistadu 124,690 iha tinan 2009 nian, ne’e signifika kombatente hamutuk 60,247 verifika ona.

Hosi verifikasaun validasaun ne’e ema 60,247 ne’e kompostu hosi munisípiu Aileu hamutuk 3,567 (40.2%), Ainaro 3,657 (36%), Baucau 5,755 (37.6%), Bobonaro 5,439 (42%), Covalima 5,157 (51,8%), Dili 3,658 (49%), Ermera 4,697 (37,3%), Laútem 5,907 (61,3%), Liquiça 5,882 (53,4%), Manatuto 4,468 (55,8%), Manufahi 4,821 (70,5%), Oé-Cusse 3,441 (86,9%), Viqueque 3,766 (48,4%), sem munisípiu 1 (1,4%) no fora de Timor 31 (31%).

Notísia Relevante: Ekipa nasionál verifikasaun dadus veteranu rejistadu 2009 foin verifika 120.000-resin

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here